रानभाजी फोडशी/कुलूची डाळ घालून भाजी

जागु पाककृती
साहित्य : फोडशी/कुलूच्या २ ते ३ जुड्या २ कांदे चिरुन पाव वाटी कोणतीही डाळ भिजवून ४-५ लसुण पाकळ्या ठेचुन २ मिरच्या चिरुन ओल खोबर अर्धी मुठ चवीनुसार मिठ १ चमचा टोमॅटो सॉस नसल्यास साखर कृती : फोडशी/कुलू ची एक एक पाती वेगळी करून घ्या खाली जास्त पांढरा भाग असल्यास काढा. मध्ये जर कडक दांडी असेल तर काढा आणि स्वच्छ धुवून चिरुन घ्या. भांड्यात तेल तापवून त्यावर लसुण पाकळ्या व मिरच्यांची फोडणी देउन कांदा घाला. त्यावर हिंग, हळद घाला व परतवून डाळ घालून परत परता. ह्यावर टोमॅटो सॉस घालून परता. आता ह्यावर चिरलेली फोडशी/कुलूची भाजी घाला. व झाकण ठेवा. २-३ मिनिटांनी झाकण काढून परता. भाजी बसल्यामुळे व्यवस्थित परतता येते. भांड्याच्या बाहेर जात नाही. ह्यावर मिठ घाला व डाळ शिजू द्या. डाळ शिजली की वरून खोबरे पेरून परता आणि गॅस बंद करा. झाली भाजी तय्यार. :स्मित: अधिक टिपा: हिच भाजी आधी उकडून घेण्याचीही पद्धत आहे. त्यामुळे ती मऊ होते. पण डायरेक्ट केली तर माझ्यामते जास्त रुचकर व पौष्टीक होते. हिच भाजी प्लेन माझ्या आधीच्या रानभाज्यांच्या मालिकेत आहे.
18 टिप्पण्या 18,847 दृश्ये

Comments

प्रचेतस नवीन

मस्तच झालीय भाजी.
मराठमोळा नवीन

मस्तच हो जागुतै, कुठुन शोधुन आणता हो हे सगळं.. कधी खायला मिळेल की नाही माहित नाही पण माहिती मिळतेय तेच खुप आहे. :) दिसायला गवतासारखी असली तरी चवीला चांगली असावी अशी दिस्तेय.. कांद्याच्या पातीसारखी.
श्रीरंग_जोशी नवीन

खासच दिसत आहे रानभाजी. फार चविष्ट असणार नक्कीच.
उदय के'सागर नवीन

व्वा व्वा... पावसाळ्यात असल्या भाज्या खाण्यात जाम मज्जा.... त्यात अपल्याला तर रानभाज्या जाम अवडतात ...पण कुठे मिळणार हि भाजी अता... मंडई धुंडाळणे आले :)
उदय के'सागर नवीन

एक्झ्यॅकटली मी हि हिच लाईन लिहिली होती माझ्याच मागच्या प्रतिसादात पण खोडुन टाकली म्हंटल आपणच प्रश्न विचारा आणि आपणच काय उत्तर द्या ;) ... शिवाय म्हंटल मिळेलहि कदाचित उत्तर (पण विसरलो होतो तुम्हि पुण्याचे नाहित त्या त्यामुळे पुण्यात हि भाजी नेमकि कुठे मिळेल हे सांगता येणार नाहि तुम्हाला) असो :)
अर्धवटराव नवीन

आपला पत्ता द्या... आणि अश्या अनवट भाज्या हाणायला कधी येऊ ते सांगा :) अर्धवटराव
प्रभाकर पेठकर नवीन

रानभाज्या भारतिय शहरात मिळणे दुरापास्त तर इथे आखातात कुठून मिळणार? पण तशाही काही अनोळखी भाज्या इथे दिसतात. त्यात आता शोधून पाहिली पाहिजे. तंतूमय असल्याकारणाने मधूमेहींसाठी औषधी आहे असे वाचले. बाकी पाककृती सोपी आणि क्षुधावर्धक छायाचित्रांनी नटलेली आहे. अभिनंदन.