घे भरारी..मन म्हणाले,पाखरु झालो...
सोडले घरटे..नभाचे लेकरु झालो!
जाहला अंधार तेंव्हा दाटली भीती...
वाटले की..वाट चुकले कोकरु झालो!
राजरस्त्याची तमा ना आडवाटेची...
मी तुझ्या कळपात घुसलो,मेंढरु झालो!
गाव सारा गाय का म्हणतो तुला कळले...
धन्य झाला जन्म की मी वासरु झालो!
बासरीचा सूर होणे मज कुठे जमले?
राधिकेच्या पैंजणांचे घुंगरु झालो!
हुंदके दाबून सारे स्वागता गेलो...
अन तुझ्याही हुंदक्यांशी रुबरु झालो!
घेतली हाती कलम बहुधा बरे झाले...
मी मुक्या संवेदनांची आबरु झालो!
—सत्यजित
प्रतिक्रिया
12 Mar 2017 - 8:13 am | यशोधरा
लेकरु आणि घुंगरु आवडले.
12 Mar 2017 - 6:58 pm | संदीप-लेले
आणखी एक सुंदर रचना !
15 Mar 2017 - 1:17 am | सत्यजित...
यशोधराजी,फुत्कार धन्यवाद!
15 Mar 2017 - 8:50 pm | पुंबा
अतिशय सुंदर.
आजकाल फार उत्तमोत्तम कविता येताहेत मिपावर.
20 Mar 2017 - 12:33 pm | गौरी कुलकर्णी २३
आवडली !
21 Mar 2017 - 10:48 pm | सत्यजित...
सौरा,गौरीजी मनःपूर्वक धन्यवाद!