संथ पाउस पडतो
झाडे,कौले भिजवीत
जणू स्वप्न उतरते
जडावल्या पापणीत....
झाडे चिंब शहारली
पक्षी मिटत पंखात
शांत दुपार पेंगते
थेंब थेंब न्याहळत...
ओल्या लाल कौलांवर
मंद पावसाचा सूर
हिरव्या कंच शेतावर
संथ थेंबांचा पदर...
ओला वास रानीवनी
ढग पाण्यात वाहात
भोवताल सारे स्तब्ध
थेंब एकटे गातात....
प्रतिक्रिया
20 Jul 2014 - 4:46 pm | अत्रुप्त आत्मा
शेवटाला...जोरदार सरी नंतरची..शांतता अनुभवाला आली.
बाकी ठीक!
21 Jul 2014 - 11:29 am | एस
छान आहे कविता. शेवटच्या दोन ओळी खासच.
21 Jul 2014 - 12:49 pm | कवितानागेश
सुंदर शब्दचित्र.
22 Jul 2014 - 1:13 pm | स्पंदना
येस्स! शब्दचित्र!
22 Jul 2014 - 12:40 pm | मंदार दिलीप जोशी
वाह
22 Jul 2014 - 6:31 pm | सूड
>>ओला वास रानीवनी
ढग पाण्यात वाहात
भोवताल सारे स्तब्ध
थेंब एकटे गातात....
भीमाशंकरला आलेल्या अनुभवाचं चित्रण या चार ओळीत बद्ध झाल्यासारखं वाटलं.
22 Jul 2014 - 6:37 pm | मिसळलेला काव्यप्रेमी
अतिशय सुंदर... खुपच आवडली.
22 Jul 2014 - 7:25 pm | यशोधरा
काय सुरेख!
22 Jul 2014 - 10:56 pm | प्यारे१
छानच!
25 Jul 2014 - 11:07 am | वेल्लाभट
आहा ! क्या बात ! प्रत्येक ओळीला असं एक एक चित्र दिसलं आणि शेवटच्या ओळीला ती सगळी चित्र कन्सॉलिडेट होऊन एक चित्र स्थिर उभं राहिलं डोळ्यासमोर....
25 Jul 2014 - 3:26 pm | psajid
वा खुप छान कविता
25 Jul 2014 - 3:47 pm | अजया
खरच शब्दचित्र! आवडलं.