उभ्या जन्मात मी बहुधा
तुझ्या यज्ञातली समिधा ||
कधी मी सावली झाले
तुला ग्रीष्मात जपणारी
तुझ्या बहरात मी झाले
कळी गंधात रमणारी
बहरले धुंद मी कितीदा
तुझ्या यज्ञातली समिधा ||
कधी अभिसारिका झाले,
प्रिया झाले, सखी झाले
रमा नारायणाची,
शंकराची पार्वती झाले
कधी कृष्णा तुझी राधा
तुझ्या यज्ञातली समिधा ||
तुला पाहून माझ्या अंतरी
प्राजक्त दरवळतो
कुठेही जा, तुझ्यासाठीच
माझा जीव घुटमळतो
प्रिया, तू सूर्य मी वसुधा
तुझ्या यज्ञातली समिधा ||
प्रतिक्रिया
7 Sep 2009 - 11:53 pm | धनंजय
चित्रपट गीत म्हणूनही मस्त.
ही कविता वाचताना शेजारच्याच "समृद्ध करणारे असे काही" सदरातले "येणार नाथ आता" हे गाणे ऐकतो आहे.
अशाच एखाद्या चित्रपटातल्या शांत-उदात्त नायिकेच्या दिनक्रमाचे चित्रण होताना वरिल कविता स्वरबद्ध होऊन गायली जात आहे, असे चित्र डोळ्यांपुढे आले.
8 Sep 2009 - 12:04 am | बिपिन कार्यकर्ते
असेच काहीसे वाटले.
कुठेही जा, तुझ्यासाठीच
माझा जीव घुटमळतो
निरपेक्ष प्रेमाची परमावधी.
अवांतर: ही कविता वाचताना 'दुःखाच्या वाटेवर गाव तुझे लागले' वगैरे आठवले.
बिपिन कार्यकर्ते
8 Sep 2009 - 10:17 am | ऋषिकेश
समिधा हा शब्दच मला फार आवडतो.त्यागापेक्षा वेगळे असे आत्मसर्पण त्या शब्दात भरले आहे. आणि त्या शब्दाचा चपखल वापर करून कविता अधिकच खुलली आहे असे वाटते
ऋषिकेश
------------------
सकाळचे १० वाजून १४ मिनीटे झालेली आहेत. चला आता ऐकूया एक सुमधूर गीत "माझी न राहिले मी...."
8 Sep 2009 - 3:47 pm | यशोधरा
>>समिधा हा शब्दच मला फार आवडतो. त्यागापेक्षा वेगळे असे आत्मसर्पण त्या शब्दात भरले आहे.
असेच म्हणते. सुरेख कविता.
8 Sep 2009 - 12:07 pm | विमुक्त
आवडली...
8 Sep 2009 - 1:54 pm | सायली पानसे
खुप सुरेख कविता.... एकेक ओळ सुंदर आहे क्रांती ताई.
8 Sep 2009 - 3:37 pm | अनिल हटेला
नेहेमीप्रमाणे सुरेख कविता!!!
आवडली.... :-)
बैलोबा चायनीजकर !!!
I drink only days ,which starts from 'T'...
Tuesday
Thursday
Today ;-)
8 Sep 2009 - 8:04 pm | प्राजु
सुरेख!! निखळ समर्पणाची भावना आहे.
खूप आवडली.
- (सर्वव्यापी)प्राजु
http://praaju.blogspot.com/
8 Sep 2009 - 8:24 pm | अन्वय
क्रांती, छानच झालीय कविता
तुमची "करून झाले' ही गझलही खूप भावली
8 Sep 2009 - 8:49 pm | चतुरंग
समर्पणाचा भाव व्यक्त करणारी अतिशय सुंदर कविता! वा वा जियो!! :)
(यज्ञेश्वर)चतुरंग