समिधा

उभ्या जन्मात मी बहुधा तुझ्या यज्ञातली समिधा || कधी मी सावली झाले तुला ग्रीष्मात जपणारी तुझ्या बहरात मी झाले कळी गंधात रमणारी बहरले धुंद मी कितीदा तुझ्या यज्ञातली समिधा || कधी अभिसारिका झाले, प्रिया झाले, सखी झाले रमा नारायणाची, शंकराची पार्वती झाले कधी कृष्णा तुझी राधा तुझ्या यज्ञातली समिधा || तुला पाहून माझ्या अंतरी प्राजक्त दरवळतो कुठेही जा, तुझ्यासाठीच माझा जीव घुटमळतो प्रिया, तू सूर्य मी वसुधा तुझ्या यज्ञातली समिधा ||

काव्यरस

शांतरस

लेखनविषय:	कविता

याद्या 3277

प्रतिक्रिया 10

प्रतिक्रिया

चित्रपट गीत म्हणूनही

धनंजय सोमवार, 07/09/2009

चित्रपट गीत म्हणूनही मस्त. ही कविता वाचताना शेजारच्याच "समृद्ध करणारे असे काही" सदरातले "येणार नाथ आता" हे गाणे ऐकतो आहे. अशाच एखाद्या चित्रपटातल्या शांत-उदात्त नायिकेच्या दिनक्रमाचे चित्रण होताना वरिल कविता स्वरबद्ध होऊन गायली जात आहे, असे चित्र डोळ्यांपुढे आले.

+१

बिपिन कार्यकर्ते मंगळवार, 08/09/2009

असेच काहीसे वाटले. कुठेही जा, तुझ्यासाठीच माझा जीव घुटमळतो निरपेक्ष प्रेमाची परमावधी. अवांतर: ही कविता वाचताना 'दुःखाच्या वाटेवर गाव तुझे लागले' वगैरे आठवले. बिपिन कार्यकर्ते