| विस्थापित वेदना |

घे हळूच जाताना
चुलीतील काही निखारे
भर हीमवर्षावातही
तरंगतात एकाकी शिकारे |

निर्वासित म्हणूनी जाताना
घे इथली थोडी माती
डोंगरातील भग्न देवळे
तुझ्या वाटेवर नजर लावती |

लपून हळूच जातांनाही
ठेव उघडे कवाड
भावना गोठलेल्या गावात
घरासही पडू दे गार |

विसरू नकोस जाताना
आहे पाठीशी पीर
थोडेसे दान देऊनी जा
वाट पाहील फकीर |

पांढ-या कच्च बर्फात
रक्तही दिसे ठसठशीत
कितीही भय पसरू दे
जा फकिरच्या कुशीत |

भय पसरविणा-या काळाचा
आहे फकिरास राग
वेशीवरच्या उजाड मारुतीस
काढू दे तुझा माग |

फार जाऊ नको दूरवर
जरी जाहलास विस्थापित
यायचे आहे परत तुला
बर्फ पडणा-या गावात |

विजयकुमार

०७.०६.२००६