काळा-गोरा

काळा-गोरा

गोऱ्या रंगाचे फार कौतुक; काळा रंग तितकासा कधी कुणाला आवडत नाही,
या आवड-निवडीला कंटाळून; वैतागून काळा रंग गोऱ्या रंगाला काय म्हणतो .......

नाही कसला फरक देवाला, कसले काळे-गोरे
जरा हटकूनच वागतो रंग गोरा, हे नाही बरे!!! ll १ ll

आकाशात चमचम रात्री, शोभती अनेक तारे
झालर पाठीमागे काळी, म्हणून सगळे तोरे ll २ ll

आभाळात चांदोमामा, झळकतो किती छान
काळे दोन डाग जणू, शोभती ससुल्याचे कान ll ३ ll

कसे आकाश निळे, पसरले अनंत अथांग
नसेल मेघ काळा तर, दिसेल कसे सांग? ll ४ ll

दिवसभर प्रकाशात सारे, राबत जग असते
निजायला मस्त-शांत, काळी रात्रच हवी असते ll ५ ll

स्वाद छान तांदूळ पांढरा, हवा सगळ्यांना असतो
परी काळ्या मातीमध्ये, अंकुर त्याचा रुजतो ll ६ ll

शुभ्र-निळे कोणाचे डोळे, रूपडे सुंदर असते
जपायाला शोभायाला, परी हवे काजळ असते ll ७ ll

दु:ख होता कोणी कधी, चालत एकटेच असते
नसेल सोबत तरी सावली, साथ सोडत नसते ll ८ ll

गोरा रंगच फक्त छान, हा समज आहे भोळा
जीवाचा राम-श्याम, अन् माझा विठ्ठल सावळा ll ९ ll

नको दाखवू गोऱ्या रंगा, फुशारकी मला तुझी
तीट लावून माझीच मग, दृष्ट काढतात तुझी ll १० ll

- सार्थबोध