असतात रंग ढंगहि वेडे
झरतात छटा रत रुधिराच्या
हृदयात बंदिशी अनोळखी
डोळ्यांकाठी रति भावुकशा
खल मदन उरी रण रिपुकांचे
ओठांवरती नित शब्द मुका
काया माया बहु काटेरी
ओढाळ मती अस्वस्थ सखा
चंद्रास न कळते झिजलेले
पाण्यास व्यथा परि आकळते
फेसाळ शिरी कल्लोळे जळ
एकांत कुंद साहतो कळा
सारेच कसे हे अवरोही
तळ नितळ सकळ ढवळे गात्री
आभाळ दूर दूरच सरके
मग श्वास फिरे नत माघारी
डोहात बंद अगणित रात्री
गंधर्व क्षणांच्या गंध कुपी
अस्पर्शधुंद हा ओलावा
अनुनय समिधांचा मापारी
........................अज्ञात
प्रतिक्रिया
25 Jan 2013 - 11:58 am | स्पंदना
म्हणजे काय? अनुनय कळलं, समिधाही कळल्या, एकुण वरवर कवितेच्या संदर्भाने सारी कविता उमजली पण, मापारी?
25 Jan 2013 - 12:43 pm | अज्ञातकुल
मापारी म्हणजे मोजमाप करणारा. अनुनयाच्या समिधांचं मोजमाप करणारा.
25 Jan 2013 - 2:08 pm | स्पंदना
वाटलच होतं. पण आम्ही मापाड्या हा शब्द जाणतो, म्हणुनच जरा खात्री करु घेतली.
धन्यु!
25 Jan 2013 - 8:10 pm | शुचि
काहीतरी तरल आहे हे जाणवले.
28 Jan 2013 - 10:25 am | अज्ञातकुल
धन्यवाद :-)
27 Jan 2013 - 12:50 am | इन्दुसुता
ओढाळ मती अस्वस्थ सखा
अनुभव आहे.. जीवघेणा...
कविता आवडली
28 Jan 2013 - 10:24 am | अज्ञातकुल
अनुभव आहे.. जीवघेणा.. इथे मला समाधान मिळालं. कविता पोहोचल्याचा आनंद मिळाला. आभारी आहे मनापासून. :-)
28 Jan 2013 - 10:54 am | प्रा.डॉ.दिलीप बिरुटे
कविता आवडली.
चंद्रास न कळते झिजलेले पासूनच्या पुढील ओळी खासच.
-दिलीप बिरुटे
29 Jan 2013 - 12:12 pm | अज्ञातकुल
धन्यवाद बिरुटे सर :-)
29 Jan 2013 - 12:31 pm | मिसळलेला काव्यप्रेमी
आपल्या कल्पनाविस्तारास __/\__
अतिशय आशयगर्भ आहे रचना...
29 Jan 2013 - 2:35 pm | अज्ञातकुल
मिका,
आपल्या प्रतिसाद सातत्याबद्दल मी कृतज्ञ आहे. तसा प्रतिसाद इतरांना देण्यात मी कमी पडतो याबद्दल दिलगीर पण आहे. अनेकांचा गैरसमजही होत असेल त्यामुळे. आपला असाच लोभ असू द्यावा. मला वेळ काढायलाच हवा आता. :-)
30 Jan 2013 - 2:49 pm | सांजसंध्या
प्रत्येक कडव्यातून वेगवेगळ्या प्रतिमांमधून चित्रदर्शी दिसला. अनुनय एका कडव्यात जाणवला.. इतर कडव्यात शोधतेय अजून..
(काही ठिकाणी शब्दरचना बोजड वाटली)
5 Mar 2013 - 4:37 am | फिझा
छान आहे कविता ......