घाटमाथ्यावर पसरले, उन लाल कोवळे
पानाफुलात जागले, एक चैतन्य आगळे
साज मोत्याचा लेवुन, चराचर नटले
निरखून स्वरूप देखणे, साजिरे लाजले
घाटमाथ्यावर घंटानाद, शांत जळात घुमला
ओल्या पायरीचा गंध, आकाशी दरवळला
किलबिल पाखरांची, फांदीफांदीशी लगबग
भरदार त्या तरुदेही, सुखी घरट्याचे तरंग
घाटमाथ्यावर लागती, तप्त ऊन्हाच्या झळा
गाभाऱ्यास देइ थंडावा,रंग कातळाचा काळा
उष्मा शोषून आकंठ, येती सावल्या मंडपात
ओव्याअभंगांची गोडी,येई साखरफुटान्यात
घाटमाथ्यावर विसावले, ऊन सोनेरी सावळे
एकांती रमल्या मनोमनी, सावल्यांचे सोहळे
कधी गुंफती हात हाती,कधी टिपत पाणी
पारावर पाखरे गाती, उन्हापावसाची गाणी
घाटमाथ्यावर पांघरला, शीतल चांदवा चंद्राचा
काळ्याशार डोहाशी, एकरूप रंग कातळाचा
गाभाऱ्यातून येती बाहेर, दोन सावल्या थकून
शांत नीरव तो काळोख, घेती श्वासात भरून
प्रतिक्रिया
14 Apr 2016 - 12:01 pm | चांदणे संदीप
घाटमाथ्यावरला एक दिवस...
14 Apr 2016 - 12:07 pm | प्रचेतस
वाह...!
घाटमाथ्यावर उभं राहून पाताळेवेरी गेलेली दरी निरखण्याचा आनंद आगळाच.
उन्हाळ्यात अगदी राकट धाकट पुरुषी दिसणारा घाटमाथा पावसकाळात मात्र नव्या नवरीसारखा हिरवाकंच शालू नेसून येतो.
14 Apr 2016 - 12:20 pm | नीलमोहर
सुरेख..
14 Apr 2016 - 12:21 pm | अभ्या..
आह्ह्ह.
अप्रतिम
14 Apr 2016 - 5:08 pm | एस
वा! क्या बात है!
14 Apr 2016 - 10:39 pm | रातराणी
धन्यवाद :)
14 Apr 2016 - 10:43 pm | पैसा
सुरेख!
15 Apr 2016 - 7:53 pm | शिव कन्या
गाभाऱ्यातून येती बाहेर, दोन सावल्या थकून..... ताकद इथे आहे.
आणखी लिही.
चित्रमय वर्णन आवडले.
16 Apr 2016 - 2:06 am | स्रुजा
फार च छान !
16 Apr 2016 - 6:30 am | विजय पुरोहित
खूप
खूप
खूप
खूप
सुंदर काव्य...
16 Apr 2016 - 4:48 pm | ज्ञानोबाचे पैजार
सुरेख अतिशय सुरेख. डोळ्यासमोर घाटमाथ्याचे चित्र उभे राहिले
आवडली कविता.
पैजारबुवा,
16 Apr 2016 - 4:59 pm | अत्रुप्त आत्मा
सल्लाम!
16 Apr 2016 - 5:07 pm | भरत्_पलुसकर
खतरा लिहिता ओ तै!
16 Apr 2016 - 8:18 pm | रेवती
डोळ्यासमोर सगळे येत होते. कविता आवडली.
16 Apr 2016 - 10:30 pm | बोका-ए-आझम
शेवट प्रचंड आवडला!
17 Apr 2016 - 10:06 am | रातराणी
सर्वांना पुन्हा एकदा धन्यवाद :)
17 Apr 2016 - 10:28 am | इडली डोसा
सगळीचं कडवी अप्रतिम आणि चित्रदर्शी!
17 Apr 2016 - 10:28 am | इडली डोसा
सगळीचं कडवी अप्रतिम आणि चित्रदर्शी!
17 Apr 2016 - 10:28 am | इडली डोसा
सगळीचं कडवी अप्रतिम आणि चित्रदर्शी!
17 Apr 2016 - 2:28 pm | सस्नेह
पोचले मी घाटमाथ्यावर !
ते पायरीचा गंध फारच आवडले.
अतिशय आवडली अलवार कविता.
17 Apr 2016 - 2:37 pm | टवाळ कार्टा
खत्रा
तांबीय काव्यासाठी कच्चा माल ठासून भरलेला आहे =))
17 Apr 2016 - 9:04 pm | उल्का
लयबद्ध अप्रतिम काव्य! मस्तच...