आजही जेव्हा
स्वप्नांत तुझ्या....
रात्र रंगुनी जाते,
एकएकट्या नभात तुझ्या
अनोळखी रंग भरुनी जाते,
दूर लुकलुकणाऱ्या चांदण्यात
मग स्वत:ला हरवताना
तू खरं खरं सांग
तुला मी आठवतो का गं?
आजही जेव्हा
येण्याने तुझ्या....
आसमंत मोहरून येतो,
नुसत्या चाहुलीने तुझ्या
अलवार गंधाळुन जातो,
धुंद मदहोशणाऱ्या निशिगंधात
मग स्वत:ला विरघळवताना
तू खरं खरं सांग
तुला मी आठवतो का गं?
आजही जेव्हा
ओढीने तुझ्या....
बेलगाम वहावत येतो,
हरएक अदेवर तुझ्या
बावरा खुळ्यागत होतो,
त्याच्या आसुसलेल्या आवेगात
मग स्वत:ला भिरकावताना
तू खरं खरं सांग
तुला मी आठवतो का गं?
आजही जेव्हा
इशाऱ्यावर तुझ्या....
बेधुंद बरसत जातो,
नाजुक स्पर्शाने तुझ्या
चिंब शहारत जातो,
ओंजळीत साठलेल्या त्याच्यात
मग स्वत:ला पहाताना
तू खरं खरं सांग
तुला मी आठवतो का गं?
आजही जेव्हा
क्षितिजावर तुझ्या....
सांज रेंगाळुनी जाते,
जाताना मागे आठवांच्या
सावल्या सोडुनी जाते,
आयुष्याच्या अश्या सांजरातीत
मग स्वत:ला शोधताना
तू खरं खरं सांग
तुला मी आठवतो का गं?
प्रतिक्रिया
19 Sep 2015 - 9:29 am | एस
मस्त आहे कविता.
19 Sep 2015 - 11:33 am | विशाल कुलकर्णी
मस्त रे...
19 Sep 2015 - 11:33 am | मांत्रिक
सुंदर आहे! पण ३र्‍या कडव्यात वार्‍याचा आणि ४थ्या कडव्यात पावसाचा उल्लेख पाहिजे होता, असे वाटते. कारण त्याशिवाय अर्थ थोडा संदिग्ध होतोय.
19 Sep 2015 - 7:12 pm | एक एकटा एकटाच
मुद्दामून डायरेक्ट उल्लेख टाळला.....
वहावणं,बरसणं
ह्या क्रियापदातुन वाऱ्याचे आणि पावसाचे अस्तित्व जाणवेल असं दाखवायच होत.
तरी पुढच्यावेळेस काळजी घेईन.
19 Sep 2015 - 12:39 pm | रातराणी
वा! सही!
19 Sep 2015 - 3:15 pm | पद्मावति
मस्तं! सुंदर लिहिलंय.
19 Sep 2015 - 3:57 pm | प्रा.डॉ.दिलीप बिरुटे
तिला खरंखरं काही विचारू नका. आणि प्रेमात पडला असाल तर विचारू नका की तुला मी आठवतो का म्हणून ! तुमची आठवण येईल तिला अगदी फुरसतीच्या वेळात जेव्हा तिचा वेळ जात नसेल तेव्हा तुमची आठवण येईल तिला. तुम्ही बसा च्युत्यासारखी तिची वाट पाहात ! :)
-दिलीप बिरुटे
19 Sep 2015 - 5:19 pm | प्यारे१
डिट्टो. ;)
बरं झालं सरांनीच टाकला प्रतिसाद.
बाकी सब भूल के सर तुम्हाला एक पार्टी लागू.
(प्रेमात आणि युद्धात सारं काही माफ असतं.)
19 Sep 2015 - 7:08 pm | एक एकटा एकटाच
ह्याच्याशी एकदम सहमत
22 Sep 2015 - 8:31 pm | प्रभाकर पेठकर
तुम्ही बसा च्युत्यासारखी तिची वाट पाहात ! :)
सरांचा आयडी हॅक तर झाला नाही नं!
8 Dec 2015 - 7:25 pm | अभ्या..
भारीच प्रतिसाद ओ सर. काय पण म्हणा पण तुम्ही भारी, तुमचं लॉजिक भारी. एकूण्च लै भारी.
जिंदगीभर पेडस्टल फ्यान बनून उभा केलेत तरी मुंडी हलवीत उभा राहीन. :)
आपले मित्र आजच ऐकवलेत हे तत्वज्ञान. पोरी फक्त स्वतःची सोय पाहतात. अहाहाहाहा. अप्रतिम.
19 Sep 2015 - 7:00 pm | ज्योति अळवणी
छान आहे पण सौमित्र यांच्या 'बघ माझी आठवण येते का' या कवितेची आठवण झाली ही कविता वाचून
19 Sep 2015 - 7:16 pm | एक एकटा एकटाच
सौमित्र ची ती कविता मला ही खुप आवडते.
बहुतेक दोन्ही कवितेचा भाव सारखा असल्यामुळे तसं वाटत असेल.
पण तरीही सौमित्रच्या कवितेची आठवण करून दिल्याबद्दल धन्यवाद.
तसाही आता बाहेर मस्त पाऊस पडतोय, ती कविता ऐकायचा मस्त चान्स जुळुन आलाय.
19 Sep 2015 - 7:04 pm | जव्हेरगंज
छान आहे की कविता....!
19 Sep 2015 - 7:12 pm | अजया
छान कविता
19 Sep 2015 - 7:12 pm | एक एकटा एकटाच
सगळ्यांचे मनपुर्वक आभार.
19 Sep 2015 - 7:53 pm | अत्रुप्त आत्मा
टाळ्या!
मस्त!
22 Sep 2015 - 8:17 pm | निनाव
Khoopach mastay..
22 Sep 2015 - 8:32 pm | प्रभाकर पेठकर
का हो, का? अशी, भरलेल्या जखमेवरची, खपली काढलीत?
22 Sep 2015 - 9:56 pm | बोका-ए-आझम
ही कविता वाचल्यावर मला का कुणास ठाऊक ' हम दिल दे चुके सनम ' मधलं हरिहरन यांनी गायलेलं ' झोंका हवा का ' हे गीत आठवलं. प्रेमभंगी माणसांची भावना अचूक पकडणारे दोन्हीही आविष्कार!
22 Sep 2015 - 10:06 pm | मांत्रिक
हं!!! खरंच!!! तितकेच रोमँटिक!!! तितकेच सुंदर!!!
23 Sep 2015 - 9:05 am | खटपट्या
अरेरे,
गेले ते दीन गेले....नकाहो
28 Sep 2015 - 11:53 pm | समीर_happy go lucky
अप्रतिम
8 Dec 2015 - 5:53 pm | विश्वव्यापी
सुंदर कविता .मस्त लिहिलंय.
15 Dec 2015 - 11:10 pm | एक एकटा एकटाच
सगळ्यांचे मनपुर्वक आभार
15 Dec 2015 - 11:16 pm | शार्दुल_हातोळकर
आठवणींच्या जगात घेऊन जाणाऱ्या ओळी आहेत या सगळ्या....
16 Dec 2015 - 5:26 pm | मीता
खूप आवडली कविता.