जेव्हा अदम्य ऐसी
निद्रा कवेत घेते
आकाशभाषितांना
ध्वनिचित्ररूप येते
अंधार भिनत जाता
भवताल स्तब्ध होते
संवेदनांस अवघ्या
व्यापून साक्षी उरते
दिग्बंध सैल होती
तर्कास काम नुरते
कालौघ थांबतो अन्
आभास सत्य होते
अज्ञातशा स्वरांचा
अनुनाद ऐकू येतो
एकेक जाणिवेचा
अस्पष्ट बिंदू होतो
निद्रा अशी कृृृृपाळू
अंकी तिच्या मी क्लांत
मी शून्य एरवी, पण
निद्रेत मी अनंत
प्रतिक्रिया
19 Feb 2021 - 11:23 am | गणेशा
अज्ञातशा स्वरांचा
अनुनाद ऐकू येतो
एकेक जाणिवेचा
अस्पष्ट बिंदू होतो
अप्रतिम..
शब्द अवघड असले तरी त्यामागचा अर्थ जबरदस्त आहे..
खूप दिवसांनी कविता विभाग उघडला..
मस्त वाटले कविता वाचुन...
19 Feb 2021 - 5:52 pm | प्राची अश्विनी
कवितेचं शीर्षक पाहिलं आणि ओळखलं की तुमचीच कविता असणार.
मी शून्य एरवी, पण
निद्रेत मी अनंत..
क्या बात!
19 Feb 2021 - 6:29 pm | ज्ञानोबाचे पैजार
आवडली, खुपच आवडली
पैजारबुवा,
19 Feb 2021 - 10:44 pm | कर्नलतपस्वी
सुदंर
19 Feb 2021 - 10:45 pm | कर्नलतपस्वी
सुदंर
21 Feb 2021 - 3:41 pm | अनन्त्_यात्री
सर्व कवितारसिकांना धन्यवाद.
21 Feb 2021 - 4:50 pm | राघव
आवडले. :-)