कृष्ण नाही गोकुळी

रंग नाही गंध नाही रास नाही गोकुळी
विरह वेड्या गौळणीचा श्वास नाही गोकुळी

गोपिकांचे लक्ष भारी दूध लोणी लपविती
दूध लोणी चोरण्याची आस नाही गोकुळी

सांज वेळी कृष्ण जाई वाजवूनी बासुरी
अधर वेड्या बासुरीचा वास नाही गोकुळी

मोहनाने मोहलेल्या गौळणीला गाठली
कृष्ण प्रेमी गुंगण्याचा भास नाही गोकुळी

आठवांचे लोट येती नंदराणी सांगते
गोकुळीला जगविणारा त्रास नाही गोकुळी