विडंबन

अनिरुद्ध अभ्यंकरांची सुंदर गजल'चैन' आम्हाला चांगलीच हलवून गेली आणि आम्ही बेचैन झालो!;)

गजल वाचुन हालतो 'वरचाच मजला'
काय मी आता करु? घरचाच मजला

हालला आहेच तो आता तरीपण
व्यर्थ शब्दांचा तुझ्या का जाच मजला

का विडंबन रोजचे असते कपाळी?
प्रश्न मेले लाविती बघ आच मजला

वायदा सार्‍या कवींचा ज्ञात मजला
कायदा हा रोजचा झालाच मजला

मी भरवसा त्या कवींचा काय द्यावा?
छळतात जर त्याच त्या गजलाच मजला

संस्थळांची मात्र ह्या झाली दुकाने
सर्व म्हणती माल घ्या हो हाच,मजला

आमचे प्रेरणास्थान आमच्या सदगुरु अनिरुद्ध अभ्यंकर उर्फ केशवसुमारांची चैन

कविता हल्ली सारख्या छळतात मजला
आणि ओळी चार मग सुचतात मजला

टंकले नाही मी काही तरीपण
अर्थ कडव्यांचे सलतात मजला

कवीलोकांची का खुलली कळी ?
प्रश्न हे आता असे पडतात मजला

कायदेही काही निवृत्तीचे असू द्या
फायदे पुनरागमनात हे दिसतात मजला

मी भरवसा कवितांचा काय द्यावा?
प्रतिसादही जर असे गिळतात मजला

प्रतिसादांचे सर्व रिकामे रकाने
खरडीही आजकाल ते विकतात मजला

तुझ्या गळा, माझ्या गळा,
सीबीआय चौकशीच्या माळा.

दाद मागायची कोणाला ?
चला रे आता कोर्टात चला.

तुज "पोटा", मज "मोक्का".
आणखी "टाडा" कोणाला?
लाज वाटते का तुम्हाला ?
मला कुणाची, देशाला.

तुझ्या गळा, माझ्या गळा.
सीबीआय चौकशीच्या माळा.

तुज झटका, मज फटका.
आणखी अटका कोणाला ?
सांगू कुठल्या नेत्याला.
सांग तिकडच्या "भाई"ला.

तुझ्या गळा, माझ्या गळा.
सीबीआय चौकशीच्या माळा.

आसू आसू डोळ्यात आसू.
वरवर खोटे हसू हसू.
मंत्रीपदी आता नको बसू.
सरकार आमचे तसू तसू.

खासदार फोडू, सरकार पाडू.
काढीत जाऊ आज "व्हिप" साजणी..!

असंतुष्ट गाठू,पैशास वाटू
कोटीत होई सारे ठीक साजणा..!

नको काळजी तू कर खुशाल बंड,
इलेक्शन विना रे दुजा काय छंद
तुला देतो साथी ,मी हवी ती खाती,
आत्म्यास तूही थोडे वीक साजणी..!

संसदेत चाले अरे हा तमाशा.
डाव्या उजव्यांची कशी एक भाषा
प्रतिष्ठाच सारी धुळीला मिळाली.
कसे गद्दारांचे आले "पीक"साजणा..!

विश्वास निष्ठा लिलावात सारे.
इथे नीतीमत्ता कुठे शोधता रे !
तू का मनाशी ,लाज वाटून घेशी ?
अशी लोकशाहीची आहे "रीत" साजणी..!

-- अभिजीत दाते

बुश:काल होता होता, `लाल'रात्र झाली

(आमची प्रेरणा: उषःकाल होता होता काळरात्र झाली ! )

बुश:काल होता होता, `लाल'रात्र झाली
अरे, चला विश्वासाच्या पेटवा मशाली !

कुण्या चार खासदारांची आस मी धरावी ?
वोट कोण देई; कुणाची वाट मी पहावी ?
कसा मोहनाचा जीव, होई वर-खाली !

कसा घाव करिती `फिरुनी' विळा नि हातोडा
खाई भाव बाजारात, लंगडा ही घोडा
घरावरची साधी कौले, सोनियाची झाली

'ठिपका' ही सुंदर गजल घेऊन आलेल्या अनिरुद्ध अभ्यंकरांच्या वेशातल्या केशवसुमारांना आम्ही ओळखले मात्र पाठोपाठ विडंबनधर्माला जागणे आले! ;)

ठपका!

घडायचे ते घडले काही टळले नाही
पोहे खाता तुला भेटणे चुकले नाही

कळले नाही कशी अधाशी प्लेट संपली
चहा कधी मग सुरू जाहला कळले नाही

बहीण अचानक तुझी मला सामोरी आली
त्या धक्यातुन चित्त कधी सावरले नाही

मी ओठांनी निर्धाराने खूप लपवले
पण डोळ्यांना माझ्या तेही जमले नाही

नको दाखवू ओळख आता सांगत होती
तिचे इशारे पण ते मी ओळखले नाही

आमचा ही एक प्रयत्न माउस हाताळण्याचा
अर्थात प्रेरणा श्री. बेसनलाडू यांचा माउस
----------------------------------------------------------------------

टेबलावरती माझ्या रोज बघ लुकलुकतो माउस..!
एक दिवस असा नाही मी हाताळतो माउस..!

मला न जमले लिहायाला तेंव्हा मिश्किल हसला,
गमभन मग लिहुन आता संधी शोधु लागला..!

कधी उगाचच रुसला, आणिक हँगहोउनी बसला
वायर लेसच्या युक्तीने मग पळुलागला माउस..!

अवचित नव्या लहान कळांचा शोध समजला तेंव्हा
सिडींसोबत ड्रॉवरमधुनी तळमळला माउस..!

ओट्यावरती तुझ्या किती बघ घुटमळला माउस..!
झाडू घेऊन आलो तरि ना अडखळला माउस..!

मला न जमले ठोकायाला तेव्हा मिश्किल हसला,
मनीपुढे पण स्वतः कसा बघ डळमळला माउस..!

कधी उगाचच रुसला, आणिक माळ्यावरती दडला.
रॅट किलर च्या गोळ्यांनी ना विरघळला माउस..!

अवचित ताज्या गरम भज्यांचा गंध पसरला तेव्हा
मित्रांसोबत बिळाबिळांतुन तळमळला माउस..!

नव्यानव्या कवितांची लागण, विडंबनांची बाधा,
कळफलकाच्या जोडीने मग सळसळला माउस..!

घराघरांतुन निरोप घेई गणरायांची स्वारी.
भिजून गेले डोळे, रडला, कळवळला माउस..!

( अटी मान्य केला सर्व ह्या, )
आज काँग्रेस प्रणीत आघाडी सरकार विश्वास दर्शक ठरावास सामोरे जात आहे.
बहुमतांसाठी इतर पक्षांचा पाठिंबा मिळवताना मनमोहन / सोनियाजी यांच्या मनातील ही भावना.