बुश:काल होता होता, `लाल'रात्र झाली (आमची प्रेरणा: उषःकाल होता होता काळरात्र झाली ! ) बुश:काल होता होता, `लाल'रात्र झाली अरे, चला विश्वासाच्या पेटवा मशाली ! कुण्या चार खासदारांची आस मी धरावी ? वोट कोण देई; कुणाची वाट मी पहावी ? कसा मोहनाचा जीव, होई वर-खाली ! कसा घाव करिती `फिरुनी' विळा नि हातोडा खाई भाव बाजारात, लंगडा ही घोडा घरावरची साधी कौले, सोनियाची झाली तिजोर्‍यात भरले `त्यानी', पंचवीस कोटी हाती आमुच्या रे `व्हीप'; नशीबेच खोटी आम्ही ती दुकाने, जी रे, दिवाळ्यात गेली! अशा कशा ज्याच्या त्याच्या वाढल्या उमेदी? विकाऊच जो तो; म्हणतो करा मज खरेदी ? लोकशाही शरमून गेली; माजली दलाली ! `खास-दार' उघडून देती, मते बंदिशाला तारण्यास सरकाराला गुन्हेगार आला ! म्हणू देश दुर्दैवी की `अणू' भाग्यशाली ! लाचखोर दावूनी दाम; म्हणती मार्ग `वाम' राष्ट्रपिता नोटांवरचा पुन्हा म्हणे `राम' संसदेत स्वातंत्र्याची आसवे गळाली -अविनाश ओगले