विडंबन

आमची प्रेरणा... पण जाऊ द्या...

(संदीप - सलिल आणि त्यांच्या तमाम चाहत्यांची क्षमा मागून)

जरा मजेने, जरा खरोखर बोलू काही
चला दोस्तहो, या आयटीवर बोलू काही

उगाच गाजर ऑनसाईटचे दाखवित रहा तू
गळले नाही प्रोजेक्ट तोवर बोलू काही

पी एम. पाहून चॅटींगवर कुजबुजली पोरे
पाठ फिरू दे त्याची नंतर बोलू काही

हवेहवेसे फ्लर्ट तुला जर हवेच आहे
स्मार्ट देखण्या ट्रेनीबरोबर बोलू काही

किती काळजी अप्रेजलची बघ रांगेतुन
एप्रिल नाही तर ऑक्टोबर बोलू काही

स्किल्स असू दे सीवीमध्ये काठी म्हणुनी
रिसेशनचा प्रवास खडतर बोलू काही

मूळ गीत - आयुष्यावर बोलू काही
कवी - संदीप खरे

(जयंतरावाची माफी मागून... )

दमले फराळ करता, आता निजेन म्हणते
स्वप्नातल्या दिवाळी, थोडे रमेन म्हणते

चकली जराच चुकली, हा दोष मोहनाचा
आहे जशा सरळ त्या, तैशा तळेन म्हणते

साठ्यातल्या करंज्या, फुटताच होय गोंधळ
पाकातले चिरोटे, केले 'अगेन' म्हणते

अंदाज लाडवाचे, चुकले पुन्हा नव्याने
बेसन रवा मिळोनी, गोळे वळेन म्हणते

पाळीतला उगा का बसला रुसून शंकर ?
समजावण्यास त्याला, पुर्‍या चिरेन म्हणते

शेवेस गाळताना, का हात कंप पावे ?
रचना नव्या दमाच्या, नाना करेन म्हणते

दिवाळी नंतर आलेल्या विडंबनाच्या बहरात आमचेही एक कण्हेरीचे फूल. प्रेरणा: रंगाकाकांनी पाडलेले हे विडंबन . बाकी मात्रा-बित्रा नियमाप्रमाणे आधीच फाट्यावर मारल्याने त्यात सदर काव्य बसणार नाही याची काळजी घेतलेली आहे.

'खोका' वदून गेल्या, आता नडेन म्हणतो
काढून आयड्यांना खंदा लढेन म्हणतो

गुद्दा अवांतरातला हा मी सोसणार नाही
जे जे दिलेस ठोसे सारे फेडेन म्हणतो

सारेच कंपू माझे ना उतरले स्थळी या
बसलेत खनपटीला ते वापरेन म्हणतो

माझ्याघरी कसा मी ढोसत आज बसलो!
काव्य बुधवाराचे आता लिहेन म्हणतो

चतुरंगानी दाखवलेली भाजणी, आणी थालीपीठ बघुन भुक चाळवली,
म्हणलं आपण पण पाककृती टाकावी. ;)

पाडून खूप चर्चा, आता हसेन म्हणतो
छेडून भावनांना, थोडे बघेन म्हणतो

शर गंजलेत, 'काका' मारणार नाही
जे पिडलेस तू ते, सारे जपेन म्हणतो

सारेच शाप नाही, मी उधळले जगी या
आहेत कनवटीला ते वापरेन म्हणतो

जालींदरी नवा मी, ठ्या ठ्या करून हसतो
आता कसे छ्ळावे, 'ओवी' करेन म्हणतो

'पुपे' सुसाट सुटले, ना दोष मालकाचा
घालून याच चपला, आता पळेन म्हणतो

[मास्तर चतुरंग यांची प्रेरणा आणि मुळ लेखकाची क्षमा मागून]

वाचन खूप झाले, आता लिहीन म्हणतो.
आडून प्रतिसादाच्या गंभीर लिहीन म्हणतो

पेन खिशातला हा मी काढणार आहे
जे जे दिसेल ते ते सारे लिहीन म्हणतो.

बरेच प्रतिसाद आहे मी उधळलेले या जागी
आहेत विचार डोक्यात जे इथे लिहीन म्हणतो

दिवाळी अंकातून मी निर्दोष आज सुटलो ?
(लेख लिहिण्याचा कोणीच आग्रह केला नाही :( )
शब्द शब्द जमा करुन काही लिहीन म्हणतो

आंतरजालावर दिवाळी फराळ चालू असताना ही खमंग भाजणी हाती लागली लगोलग थालीपीठ लावून टाकले! ;)

'काका' वदून गेल्या, आता बघेन म्हणतो
आडून गॉगलाच्या थोडा लवेन म्हणतो

मुद्दा वयाबियाचा मी काढणार नाही
जी जी दिसेल ती ती आता टिपेन म्हणतो

क्रेडीट आज सारे संपून गोचि होई
आहेत कनवटीला ते वापरेन म्हणतो

दिसता सुबक जराशी वळते लगेच मुंडी
आता नवीन मापे गोळा करेन म्हणतो

डोळेच वाट चुकती, ना दोष पावलांचा
बारात चांदणीच्या थोडा बसेन म्हणतो

प्रेरणा अर्थात कविवर्य मोडक यांचा प्रवास

(प्रेरणा: सांगायलाच हवी काय?)