सगळीकडे सारखेच

चांदणे संदीप's picture
चांदणे संदीप in जे न देखे रवी...
17 Apr 2018 - 11:55 am

सकाळी सकाळी क्रिकेट खेळायला
मैदानावर जमल्यावरच्या गप्पा

ते यूपी बिहारवाले लै भुरटे
विश्वास न ठेवण्याच्या लायकीचे

दिल्ली हरयाणावाले तर आगाव
एकजात सगळे माजोरडे साले

गुजराती मारवाडी तर काय
लुटायलाच बसलेत सारे

चांगले वाटतात बाहेरून पण हे
मल्लू मद्राशी पक्के आतल्या गाठीचे

आसामी बंगाली पण त्यातलेच
गोड बोलून गंडा बांधणारे

दुपारी जेवल्यानंतर टपरीवर जमलो
चहा बिडीकाडी करत बोलू लागलो

धुळे जळगाव खानदेशवाले अमुक
हे नागपूर विदर्भवाले तमुक

सांगली सोलापूरवाले साले दुष्काळी
आडमुठे अर्धवट नाशिक नगरी

सातारा कोल्हापूरवाले पण त्यातलेच
आणि कोकणी एक नंबर चिक्कू

बीड उस्मानाबादी तर मजाच
गडचिरोली चंद्रपूरवाले नक्सली

अहो, बाकी परवडले पण हे
पुन्यामुंबइकडले अतिशहाणेच

रात्री जेवल्यानंतर घराबाहेर पडलो
सोसायटीतल्या बेंचवर येऊन बसलो

हे एक्स बिल्डींगवाले काय समजतात स्वतःला
त्या वाय बिल्डींगवाल्यांची तर लायकी आहे का?

त्या पलिकडच्या सोसायटीत रोज नवी प्रकरणे असतात
आमदाराचा मेव्हणा राहतो म्हणून या सोसायटीचा माज

त्या अमक्या सोसायटीची झोपडपट्टी झालीये
आणि हे मोक्याची जागा मिळवून बसलेत साले

डि मार्ट ह्यांच्या समोर उभा राहतंय म्हणजे
साला आता भाव येणार ह्यांच्या फ्लॅटला

ह्यांच्याकडेच कसा आधी रस्ता, ड्रेनेजलाईन?
आम्ही काय रूमाल टाकून जागा धरल्यात का?

मित्रांना व्हाट्सअप वर सांगितलं एकदाचं
बाहेरच्या देशातून ऑफर आलीये जॉबची

कुठेही जा पण मिडल ईस्टला आजिबात जाऊ नको
ऑस्ट्रेलियात सगळ्यात जास्त मारतात आपल्याला

न्यूझीलंडमध्ये तर शेजारी उभे पण राहत नाहीत
आफ्रिकन देशात किडनीच काय हार्टही घेतात

युरोप जर्मनी पण आधीसारखं सेफ राहिलं नाही
अमेरिकेत तर कधी कुठे गोळी लागेल माहित नाही

इंडोनेशिया थायलंडमध्ये काहीही खातात
सौदी, कतार वगैरे लै डेंजर बाबा, नकोच!

रशिया, आईसलँड तुझ तूच ठरव
गारठून मरायच का कसं करायचं?

रात्री झोपताना खाटावर विचार आला
एवढीच तर जागा पाहिजे आपल्याला!

- संदीप चांदणे

कविता माझीमाझी कविताकविता

प्रतिक्रिया

विशुमित's picture

17 Apr 2018 - 12:19 pm | विशुमित

मस्त ... आवडली

अभ्या..'s picture

17 Apr 2018 - 12:31 pm | अभ्या..

हायला,
एकच लंबर सॅन्डीबाबा,

रात्री झोपताना खाटावर विचार आला
एवढीच तर जागा पाहिजे आपल्याला!

एपिक

पद्मावति's picture

17 Apr 2018 - 1:20 pm | पद्मावति

आहा. मस्तच!

अंतरा आनंद's picture

17 Apr 2018 - 2:35 pm | अंतरा आनंद

मस्तय. (बहुधा) ना. सी. फडकेंचा "आतले आणि बाहेरचे" असा लघुनिबंध आहे तो आठवला. ( नावात चुकभूल दे. घे.)

अनन्त्_यात्री's picture

17 Apr 2018 - 7:23 pm | अनन्त्_यात्री

पटली!

एस's picture

17 Apr 2018 - 8:46 pm | एस

वाह! क्या बात है!

डॉ सुहास म्हात्रे's picture

17 Apr 2018 - 9:10 pm | डॉ सुहास म्हात्रे

सुंदर !

चपखल वेचक टोले लगावले आहेत ! :) पण, मुद्दे दुर्दैवाने खरे आहेत. :(

प्रचेतस's picture

17 Apr 2018 - 9:59 pm | प्रचेतस

सुंदर

नाखु's picture

17 Apr 2018 - 10:48 pm | नाखु

दाहक ऊन अगदी योग्यवेळी!!!

चर्चा चोथ्या गारपीटग्रस्त कोओरडवाहू नाखु वाचकांची पत्रेवाला

जव्हेरगंज's picture

17 Apr 2018 - 11:29 pm | जव्हेरगंज

उत्तम!!!

रुपी's picture

18 Apr 2018 - 1:13 am | रुपी

सुरेख!

चित्रगुप्त's picture

18 Apr 2018 - 4:15 am | चित्रगुप्त

उदाहरणार्थ थोरच वगैरे.

अत्रुप्त आत्मा's picture

18 Apr 2018 - 6:22 am | अत्रुप्त आत्मा

लै भारी!

मस्त लिहिली आहे , सँडी भाई
सिद्धेश्वर विलास पाटणकर

ज्ञानोबाचे पैजार's picture

20 Apr 2018 - 6:09 pm | ज्ञानोबाचे पैजार

सुरेखच आवडली कविता
पैजारबुवा,

अनुप ढेरे's picture

20 Apr 2018 - 8:09 pm | अनुप ढेरे

मस्तं कविता! आवडली :)

शाली's picture

2 May 2018 - 4:55 pm | शाली

मस्त! मस्त!!