फुल सांगे काट्याला ………

फुल सांगे काट्याला
किती आनंद देतो मी सगळ्यांना
माझ्या रूपाच, रंगाच अन सुगंधाच
किती ओढ साऱ्या जणांना

गोड गाण्यांत, केसांच्या वेणीत
किती गुंफतात मला
देवाच्या चरणाशी वाहण्याच
भाग्य मिळेल काय तुला?

थोडस हसून काटा बोलला फुलाला
मी असताना सहज कोण छेडील बरं तुला
एक काजळाचा ठिपका समज तू मला
लागो ना नजर कुणाची तुला

कुणाच्या चरणाशी वाहण्याच भाग्यं
कधी नाही मिळणार मला
ह्या कळ्याफुलाचं, वेलीपानाचं सौदर्य
पाहण्याचं भाग्य काय कमी आहे मला.