सागरात हेलावते
नाव माझी वादळात
शीड तिचे तुटलेले
दिशाहीन अंधारात |
लाटांमागे येती लाटा
कल्लोळ हा आठवांचा
दूर दूर नभांगणी
खेळ रंगे सावल्यांचा |
शब्द शब्द जपलेला
सूर एक भारलेला
आयुष्याचा सारीपाट
मीच माझा मांडलेला |
तुटलेले काही बंध
ओढ लावती जीवाला
काही नाती, क्षण काही
माझे, मागते देवाला |
सूर्यबिंब ढळे जळी
अस्त जणु वेदनेचा
शुभ्र ,शीतल चांदवा
देई दिलासा सुखाचा |
गंधीत हा गार वारा
साद देई तुला, मला
वेदनेच्या वाटेवर
साथ देऊया सुखाला |
प्रतिक्रिया
11 Nov 2008 - 9:10 pm | अनिरुध्द
गंधीत हा गार वारा
साद देई तुला, मला
वेदनेच्या वाटेवर
साथ देऊया सुखाला |
एकदम सुंदर कवीता. आवडली.
11 Nov 2008 - 9:13 pm | प्राजु
अतिशय सुरेख कविता.
- (सर्वव्यापी)प्राजु
http://praaju.blogspot.com/
11 Nov 2008 - 11:58 pm | विसोबा खेचर
सुंदर कविता...! क्या बात है
तात्या.
17 Nov 2008 - 2:31 pm | राघव
सुंदर कविता. :)
सागरात हेलावते
नाव माझी वादळात
शीड तिचे तुटलेले
दिशाहीन अंधारात |
तुटलेले काही बंध
ओढ लावती जीवाला
काही नाती, क्षण काही
माझे, मागते देवाला |
हे विशेष भावलेत.
मुमुक्षु
17 Nov 2008 - 3:06 pm | आनंदयात्री
>>आयुष्याचा सारीपाट
>>मीच माझा मांडलेला |
या ओळी खुपच आवडल्या !
मस्त !!