चकली दिवाळीच्या फराळात चकली ही अगदी हवीच हवी. पण हवी तेव्हा चकलीची भाजणी उपलब्ध न होणार्‍या ठिकाणी राहिल्यावर कुठली चकली नि काय.. एकदा असाच चकलीचा खमंग विषय चालला असता माझ्या भावजयीने तिच्या आईच्या - डॉ. दीपा कोल्हटकरांच्या ह्या रेसिपीने केलेल्या चकल्या खाल्ल्यावर भाजणीचा हा प्रश्न सुटला. तर ह्या बिनभाजणीच्या चकल्यांसाठीचे साहित्य - १ वाटी तेल, १ वाटी मैदा, १ वाटी बेसन किवा फुटाण्याचे डा़ळे, ४ वाट्या तांदळाचे पीठ. ओवा, मीठ, तिखट, तीळ - चवीनुसार कृती - बेसन/फुटाण्याचे डाळे भाजून घ्या. बेसन, मैदा, तांदळाचे पीठ, ओवा, मीठ, तिखट , तीळ हे सर्व एकत्र मिक्स करून घ्या. तेल गरम करा. हे गरम तेल वरील मिश्रणात घाला व कालवून ठेवा. साधारण तासभर झाकून ठेवा. तासाभराने ते परत एकदा चांगले कालवा. एका सोर्‍यापुरतेच पीठ भिजवा व चकल्या पाडा व तळा पुढच्या घाण्यासाठी प्रत्येक वेळी तेवढेच पीठ भिजवून चकल्या पाडा.