एका प्रेमाची गोष्ट

विचार तुझा मनी येता , आठवणींच्या उठल्या लाटा,
झाल्या जाग्या तरल भावना , उजळल्या पुन्हा विसरल्या वाटा.

आठवतो मज दिवस तो पहिला ,जेव्हा आपला परिचय झाला ,
परिचयाच्या या वाटेवरुनी ,प्रेमाचा अंकुर उमलला.

प्रेमाचा अंकुर बहरला ,बहरून शुभमंगल झाला ,
आठवतो मज अजून सारखा , मिलनाचा तो क्षण पहिला .

प्रेमाचा हा तरु मोहरला ,आल्या त्याला नव्या पालव्या ,
आठवतो अजून दिवस तो मजला , दोनाचा जेव्हा त्रिकोण झाला .

सुखी आपला संसार चांगला , नजर लागली , कसा बिघडला ?
गेलीस ग तू सोडूनी अर्धा , सुंदर आपला डाव मांडला .

तरीही हा चिमणा एकला , पांखारांसाठी जगाला श्रमाला,
उडूनी गेली पांखरे आतां ,चिमणा राहिला ग एकला !

विचार तुझा मनी येता , आठवणींच्या उठल्या लाटा,
झाल्या जाग्या तरल भावना , उजळल्या पुन्हा विसरल्या वाटा.