नशीबाच्या शोधात दूर देशी आलो
अन इथवर येऊन परतीच्या वाटाही विसरून गेलो
हीच झाडं, हेच वारे, हेच ऋतू आपले
पसरलेले हिरवे माळ अन रस्तेही आपले
इथल्या मातीत पाय रोवून उभे राहू लागलो
पाळामूळांसकट आता इथेच गुंतू लागलो
तरीही येतो एक क्षण असाच अडवा तिडवा
हृदयात थेट हात घालून घेतो सारा मागोवा
फरपट्ल्यासारखा घेऊन जातो पुन्हा घरट्याकडे
रक्ताळलेले आपण खोल आत मनामध्ये
जखमा तशाच भरून निघतात पण व्रण मात्र तसेच
प्रत्येक व्रण एक दूत होतो आठवणींचा पूल होतो
आता पाय मातीत रोवूनही त्यात मूळं रुजत नाहीत
त्यांनाही कदाचित वाटत असावं ही माती आपली नाही
पायाखालची जमिन सरकतानाही रुजल्याचा आव आणतो
ही माती ही झाडं हे सारं आपलंच असं मनाला भासवतो
खोल आत कुठेतरी ती जखम ठुसठुसतच असते
तिची जाणीव चेहऱ्यावर कधीही आणायची नसते
पूर्वी झटकलेल्या आठवणींवरही आता पुटं चढू लागतात
आठवांचे आठव ही येईनासे होतात
पुन्हा तसाच एक क्षण फरपटत नेतो
आपणही आता "सवयीने" फरपटत जातो
आता जखमा फार होत नाहीत
आणि झाल्या तरी सलत नाहीत
आता आपणही सरावलेले असतो
मनही सरावलेले असते
आणि पलिकडे आपल्या नसण्याला आता घरटेही सरावलेले असते....
प्रतिक्रिया
10 Sep 2013 - 12:59 pm | मुक्त विहारि
मस्त..
10 Sep 2013 - 1:49 pm | नित्य नुतन
अहाहा ... हृदयाला हात घातलात ... कोणे एके काळी आमची सुद्धा अशीच अवस्था होती ... सगळे सोडून परत आले .. पण इथे सुद्धा थोडी फार फरपट आहेच आहे ....
10 Sep 2013 - 2:06 pm | संजय क्षीरसागर
उगीच कशाला फरपट चालवलीये जीवाची?
10 Sep 2013 - 2:55 pm | अत्रुप्त आत्मा
@पुन्हा तसाच एक क्षण फरपटत नेतो
आपणही आता "सवयीने" फरपटत जातो
आता जखमा फार होत नाहीत
आणि झाल्या तरी सलत नाहीत
आता आपणही सरावलेले असतो
मनही सरावलेले असते
आणि पलिकडे आपल्या नसण्याला आता घरटेही सरावलेले असते....>>> __/\__
12 Sep 2013 - 7:37 am | स्पंदना
सुरेख!
आपण इथले नसतो अन तिथले उरत नाही...
12 Sep 2013 - 12:58 pm | वेल्लाभट
एकीकडे फरफट एकीकडे घुसमट हो!
मग रोजच्या घुसमटीपेक्षा ही अशी अधून मधून होणारी फरफट बरी नाही का!
असं आपलं मला वाटलं.
काव्य उत्तम, आणि अगदी भावविश्वात जायला भाग पाडणारं. छान.
12 Sep 2013 - 1:05 pm | चाणक्य
झालीये रचना.
12 Sep 2013 - 3:27 pm | arunjoshi123
छान कविता. कळली, भावली.
15 Sep 2013 - 4:58 pm | सुधीर
आवडली कविता!