केळ्याचे काप

मंडळी श्रावण पाळणार्‍यांची जाम पंचाईत झाली असेल नाही, कधी श्रावण सरतोय आणि कधी घासासोबत तो वास येतोय असं झालं असेल ना !! मग एक उपाय आहे ती म्हणजे ही पाकृ, श्रावण पाळल्याचं समाधान आणि मासळी खाल्ल्याचं सुख (काहीजणं दुधाची तहान ताकावर म्हणतील याला). तसा आमचा बाराही महिने श्रावण पण पाकृ आहे ती खास मछलीबिन सावन के पानी में तडपने वालों के लिये. आज पहिल्यांदाच मिपावर पाकृ डकवत आहे त्यामुळे जरा भीती आहे मनात (मिपाकरांच्या भन्नाट प्रतिक्रिया वाचत असतो )
तर साहित्यः कच्ची केळी ३
हळद, लाल तिखट, बारीक रवा, मीठ, तळणासाठी तेल.
कृती:
कच्ची केळी (म्हणजे काप करण्यासाठी वेगळी केळी मिळतात, आकाराने लहान असतात) घ्यावीत.

त्यांची साल सुरीने नीट सोलून काढावी.

आणि मग पातळ काप करुन ते काप पाण्यात टाकावे.

हे पाण्यात न टाकल्यास काप काळे पडतात.
त्यानंतर ते काप पाण्यातून नीट निथळून त्याला हळद व मीठ लावून ५ ते १० मिनीटे मुरत ठेवावे, म्हणजे केळ्याचा चिकटपणा निघून जाईल.

त्यानंतर एका भांड्यात बारीक रवा, तिखट, हळद, मीठ एकत्र करुन घ्यावे. मीठ बेताचे घालावे कारण आधीच आपण हळद व मीठात काप मुरत ठेवले आहेत.
तर हे मुरत ठेवलेले काप वरील रव्याच्या मिश्रणात घोळवून तव्यावर मंद आचेवर तळावे.

काप छान तळून जेवणासोबत तोंडी लावायला किंवा असेच चहासोबतही छान लागतात.

मंडळी फोटो पण डकवत आहे, दिसत नसल्यास कृपया डकवण्याची योग्य पद्धत सांगणे.