मेक्सिकन हॉट चॉकलेट

गणपा यांच्या कोल्ड कॉफी मुळे जीभ तर चाळवली पण बाहेर थंडी. तेव्हा कोल्ड कॉफी एवढेच मला प्रिय असलेले हॉट चॉकोलेट केले. या वेळचे चॉकोलेट मिक्स थोडे वेगळे. घरी बनवलेले, मेक्सिकन चवीचे. ही पाकृ आहे इझाबेलाज कॅंटिना मधली. बघा आवडतेय का.
चॉकोलेट मिक्स
साहित्य
१ कप सेमीस्वीट चॉकलेट चिप्स
१/२ कप साखर
१ टे. स्पून दालचिनी पावडर

कृती
सर्व एकत्र करुन ग्राइंडर मधून बारीक पावडर करुन घ्या. हवाबंद डब्यात भरून ठेवा.

हॉट चॉकोलेट
साहित्य
१ कप दूध
२ टे. स्पून चॉकोलेट मिक्स
कृती
भांड्यात दूध आणि चॉकोलेट मिक्स एकत्र करा. मध्यम आचेवर गरम करत ठेवा. सतत ढवळत रहा. वाफा येइतो गरम करा. दुधावर फेस आला पाहिजे. कपात ओता.
किंवा माझ्यासारखे आळशी असाल तर
थोडसं दूध आणि चॉकलेट मिक्स कपात घ्या. चमच्याने ढवळुन मायक्रोव्हेव मधे १० सेकंद गरम करा. चमच्याने चांगल घोटा. उरलेले दूध घालुन ढवळा. आता परत मायक्रोव्हेव मधे २० सेकंद गरम करा. बाहेर काढून ढवळा.असेच अजून दोनदा १५-२० सेकंद गरम करणे आणि ढवळणे करा.

एंजॉय!