इंद्रधनुष्यी करंज्या

ह्या करंज्या माझ्याकडील पुस्तकात बघुन मी केल्या आहेत. माझ्या कडे उपलब्ध असलेल्या सामानानुसार थोडा बदल केला आहे. ह्या करंज्या त्यातील रंगामुळे खुप
आकर्षक दिसतात. आणि अतिशय खुसखुशीत होतात.

साहित्यः
१ वाटी रवा, १वाटी मैदा, १-१/२ वाटी ओल खोबर, २ वाट्या साखर, १/४ वाटी तेल (तळणीसाठी वेगळ लागेल) , ५ चमचे कॉन्फ्लोअर
४ चमचे तुप, १ चमचा वेलची पावडर, २ चमचे बदाम, पिस्ता, काजु पावडर ( आवडत असेल तर), हवे असतील ते खाण्याचे ४ रंग.
२ वाट्या दुध.

कृती :
रवा आणि मैदा तुप घालुन मिसळुन घ्यावा. त्याचे दोन समान भाग करावेत.
एक भाग दुध घालुन घट्ट मळुन घ्यावा. उरलेल्या भागाचे पुन्हा समान चार भाग करावेत.
प्रत्येक भागात एक एक रंग घालुन ते दुधाने घट्ट मळुन घ्यावेत. आणि तयार पाचही भाग दोन तास झाकुन ठेवावेत. (तोपर्यंत मिपा वर यावे. )
खोबर आणि साखर एकत्र करुन ते शिजत ठेवावे.
सारण शिजत आल्यावर त्यात वेलची पावडर आणि बदाम ,पिस्ते,काजु पावडर घालावी.
दोन तासांनी वरील पिठाचे गोळे चांगले कुटुन घ्यावेत.
पाववाटी तेल कोमट करुन त्यात कॉन्फ्लोअर चांगले फेटुन घ्यावे.
आता पांढर्‍या पिठाच्या गोळ्याचे चार गोळे करावेत. आणि त्यातील एका गोळ्याची पोळी लाटुन घ्यावी.
तयार पोळीवर फेटलेले कॉन्फ्लोअर व्यवस्थित लावावे.
आता रंगीत गोळ्याची पोळी लाटुन ती पांढर्‍या पोळीवर पसरावी आणि त्याला कॉन्फ्लोअर लावावे.
याप्रमाणे चार पांढर्‍या व चार रंगीत पोळ्या एकमेकांवर पसरवून त्यांची वळकटी करावी.
तयार वळकटी लांबीच्या बाजुने कापून दोन भाग करावेत,व त्याचे पुन्हा आडवे कापून अंदाजे दोन-दोन इंचाचे तुकडे करावेत.
एक तुकडा घेऊन ज्याचे पदर दिसतात ती बाजु पोळपाटाकडे करुन पुरीसारखी लाटावी.
त्यात सारण भरुन त्याची करंजी करुन मंद आचेवर तळावी.
गार झाल्यावरच खावी.