Skip to main content

ती कळ्या देऊन गेली..

ती कळ्या देऊन गेली..

प्राची अश्विनी
Published on मंगळवार, 16/06/2020 प्रकाशित मुखपृष्ठ
ती कळ्या देऊन गेली, चांदणे घेऊन गेली... कवडसे तिरपे उन्हाचे सांडलेले गणित वेळेचे प्रयत्ने मांडलेले छेद त्या देऊन गेली, चांदणे घेऊन गेली.. शब्द होते, सूर होते भोवताली गीत जुळले अन् अचानक सांज झाली गझल ती ठेवून गेली, चांदणे घेऊन गेली.. क्षण जरी गेले उडोनी कापुराचे दरवळे पण दार अजुनी गोपुराचे कोपरा उजळून गेली, चांदणे घेऊन गेली..
लेखनविषय:
कविता
याद्या 6844
प्रतिक्रिया 21

मनोज मंगळवार, 16/06/2020
मस्त आहे..मीटर मध्ये वाचता येते आहे !!

मन्या ऽ रवीवार, 21/06/2020
मला कविता नीट म्हणता (ऐकवता) येत नाही. पण आज पहिल्यांदाच कविता मोठ्या आवाजात म्हणता (ऐकवता) आली. कविता अप्रतिमच आहे.. हे वे सां न :)

चांदणे संदीप मंगळवार, 16/06/2020
कविता वरूनच गेली वर, मला घेऊन गेली! ;) (नंतर निवांत वाचतो) सं - दी - प

प्राची अश्विनी मंगळवार, 16/06/2020
:):)

ज्ञानोबाचे पैजार बुधवार, 17/06/2020
अरे? तुम्ही इथेच आहात काय? मला वाटले ती चांदणे घेउन गेली रच्याकने :- कविता आवडली.. ती गेली तरी जाताना बरेच काही देउन गेली आहे. पैजारबुवा,

गणेशा बुधवार, 17/06/2020
गझल ती ठेवून गेली, चांदणे घेऊन गेली..
बरोबर असंच करायला पाहिजे होते, :-)) :-)) -- मुळ कविता आवडली.. पहिल्या कडव्यात 'ती' म्हणजे रात्र वाटली.. सकाळ झाली आणि चांदण्या भरल्या रात्री ला ती उचलून निघून गेली.. पण दुसऱ्या कडव्यात पुन्हा सांज झाली त्यामुळे ती एक व्यक्ती वाटली तिसऱ्या कडव्यात तीच्या आठवणी.. त्या कळ्यांची आताशा फुले झाली..

प्राची अश्विनी शुक्रवार, 19/06/2020
धन्यवाद! ती येते आणिक जाते... या अजरामर कवितेचा इतका प्रभाव आपल्या सर्वांवर (त्यात मीसुध्दा आले) आहे ना, त्यामुळे ती म्हणजे ती हे पटकन लक्षात नाही येत. :)

सत्यजित... शनीवार, 20/06/2020
प्रभूंनी हे गीत लेखनाच्या 'प्रतिभे'स उद्देशून लिहिल्याचे बर्‍याच जणांना माहित नसावे! आपण उल्लेख केलेला पाहून,हे वाचलेले आठवले.

कौस्तुभ भोसले बुधवार, 17/06/2020
वाह

पहाटवारा बुधवार, 17/06/2020
मस्त जमलिये .. तुमच्या कवीता नुसत्या वाचनीय नसतात तर त्यात गेयता असते .. उत्तम गीतकार बनू शकाल ! -पहाटवारा

सत्यजित... गुरुवार, 18/06/2020
सुरेख कविता!