त्रिकाळ

Primary tabs

शिव कन्या's picture
शिव कन्या in दिवाळी अंक
25 Oct 2019 - 6:00 am


मिपा दिवाळी अंक  २०१९

अनुक्रमणिका




त्रिकाळ




प्रत्येक ओळीच्या शेवटचा शब्द पुढच्या ओळीच्या सुरुवातीला घेऊन कवितेतल्या कवितेत अंताक्षरी खेळत ही लालकेशरी फुलांची भेट मिपाकरांसाठी!

लालकेशरी निळ्याजांभळ्या शुभ्र फुलांच्या उठती लाटा
लाटांमागून वारा वाहे शेतशिवारी दिसती वाटा
वाटांवरती मायमाउली जिच्या शिरी गवताचा भारा
भाऱ्याभवती दोर बांधुनी मुलास घेते पाठीवरती
पाठ तिची हो पहा वाकली कुणी घेता का गोपाला?
गोपाला रे गोपाला चाल जरा रे गोपाला....

*****

लालकेशरी निळ्याजांभळ्या शुभ्र फुलांच्या उठती लाटा
लाटांमधुनी पहा प्रियतमे झरा सुखाचा झुळझुळ वाहे ....
वाहता वाहता गिरकी घेता खळीच पडते गालावरती
गालावरच्या खळीत खुळखुळ नाद जलाचा वाजत राही
वाजत वाजत पुन्हा सरकते वाट जलाची धावत जाते
धावत निर्झर गहिरा होतो तिथे बसू ये जरा खुशीने...

*****

लालकेशरी निळ्याजांभळ्या शुभ्र फुलांच्या उठती लाटा
लाटा उठल्या हसल्या बुडल्या आपल्या वाटे निघून गेल्या
गेले आले सर्व घडीचे हसले बसले रंग सावळा विटून गेला
गेल्यावरती कुणी न येते, एकट वाटे अता जिवाला
जीव आठवे समुद्र सारा विरून गेला जन्म भोगता

भोग भोगतो तोवर मजला नाम घेऊ दे तुझे कृपाळा
लालकेशरी निळ्याजांभळ्या शुभ्र फुलांच्या उठोत तेव्हा हजार लाटा....


20191016-122815

अनुक्रमणिका

प्रतिक्रिया

हरिहर's picture

26 Oct 2019 - 10:53 am | हरिहर

अप्रतिम!

यशोधरा's picture

26 Oct 2019 - 2:06 pm | यशोधरा

चित्रदर्शी कविता. सुंदर.

चाणक्य's picture

26 Oct 2019 - 3:18 pm | चाणक्य

काय प्रतिभा आहे. मस्त मस्त.

नाखु's picture

26 Oct 2019 - 3:20 pm | नाखु

मांडणी आवडली आहे.
असे करायला हिंमत आणि सृजनशीलता लागते,आधि चाल आणि मग त्यात चपखलपणे गाणे बसविण्यात जी लागते तीच

नाखु

शिव कन्या's picture

27 Oct 2019 - 5:42 pm | शिव कन्या

यशोधरा ताईने यात feed back देऊन संपादक म्हणून मोठेच काम केलेय.
सर्व रसिक मिपा करांना दिवाळीच्या शुभेच्छा.

पद्मावति's picture

27 Oct 2019 - 8:45 pm | पद्मावति

अतिशय सुरेख!

ऋतु हिरवा's picture

31 Oct 2019 - 3:31 pm | ऋतु हिरवा

वा वा ...फारच सुंदर ...याला कवितेचा कुठला प्रकार म्हणावा?

शिव कन्या's picture

2 Nov 2019 - 7:13 am | शिव कन्या

अंताक्षरी कविता..... :)))

प्राची अश्विनी's picture

2 Nov 2019 - 10:26 am | प्राची अश्विनी

किती सुंदर कल्पना आहेत. खळखळून वहातायत अगदी.

श्वेता२४'s picture

8 Nov 2019 - 5:55 pm | श्वेता२४

सुरेख कविता

अलकनंदा's picture

19 Nov 2019 - 2:02 pm | अलकनंदा

शब्ददेखणे काव्य आहे हे!