ग्रानोला

आज नवर्‍याच्या प्लँट मधे लॅब च्या लोकांना येता जाता तोंडात टाकायला ग्रॅनोला केला. त्याचा नमुना मिपाकरांसाठी.

साहित्य
३ कप ओट (इंस्टंट नको)
१/२ कप आक्रोडाचे तुकडे
१/२ कप बदामाचे तुकडे
१/३ कप मध
१ टे. स्पून ब्राऊन शुगर ( नसल्यास साधी चालेल)
१ टे. स्पून तेल
१ टी स्पून वॅनिला
१ कप सुकवलेल्या बेरीज किंवा मनुका
कृती
ओवन ३००F तापत ठेवा. एका १३x९ च्या बेकिंग पॅन मधे ३ कप ओट पसरुन तापलेल्या ओवन मधे ठेवा. १० मिनिटांनी बाहेर काढून त्यात आक्रोड आणि बदामाचे तुकडे नीट मिसळून परत अजुन २० मिनिटे ओवन मधे भाजा. मधल्या वेळात एका छोट्या भांडयात मध, तेल आणि साखर एकत्र करून मध्यम आचेवर साखर वितळेपर्यंत (१-२ मिनिटे) गरम करा. आचेवरुन खाली उतरुन त्यात वॅनिला घाला.
भाजलेले ओट्चे मिश्रण ओवन मधून बाहेर काढुन ओवनचे तापमान ३२५F पर्यंत वाढवा. पॅन मधील ओटवर मधाचे मिश्रण घालून नीट ढवळून घ्या. पुन्हा तापलेल्या ओवन मधे १० मिनिटे भाजा. भाजताना २-३ दा मिश्रण ढवळा. बाहेर काढून त्यात बेरीज किंवा मनुका घाला. गार झाले की डब्यात भरा.
सिरीअल सारखा दुधात घालून किंवा दह्यावर घालून न्याहारीला छान लागतो. पण आमच्या कडे सगळे येता जाता नुसताच खातात.

टीप
कपाला तेलाचा हात लावून नंतर त्यात मध घातल्यास कपाला चिकटत नाही