कैरीचे पन्हे

मे महिन्याची सुट्टी लागली की माझा आणि माझ्या धाकट्या भावाचा एक अत्यंत आवडता कार्यक्रम असायचा तो म्हणजे I Love you Rasna म्हणत रसना चे सरबत बनवणे :) आम्ही दोघेजण यासाठी प्रचंड उत्सुक असायचो. सरबत पिण्यापेक्षा ते बनवण्याचा उद्योग जास्त enjoyable असायचा. आई रसना चा pack घेऊन यायची. Orange हा all time favorite. कधीतरी कालाखट्टा हि करायचो. सक्काळी सक्काळी आंघोळ करून तयारीला लागायचो.

मोठ्ठ पातेलं, त्यात मापून पाणी, मोजून साखर घालायची आणि ढवळत बसायचं. पाण्यातून साखर अदृश्य कधी होते याकडे आम्ही डोळे लावून असायचो. नंतर त्या pack मधील powder आणि concentrated liquid पाण्यात घातलं की सूर्यगोळा जणू सकाळीच आमच्या सरबतात येउन बुडायचा आणि आमचं सरबत त्याच्या रंगात रंगवायचा. एका आगळ्याच आनंदात आम्ही सरबत बाटलीत भरायचो. त्यातील सांडवासांडवी, चिक्कट हात, रंगलेली फरशी सगळीच मज्जा! fridge मध्ये ती बाटली अशा थाटात विराजमान होई जणू एखादी राजकन्याच!
हि सगळी सरबत कहाणी आठवण्याच कारण म्हणजे आजची आपली recipe "कैरीचे पन्हे". चला.... उन्हाळ्यातील हे घरगुती स्वादिष्ट cold drink बनवूया.

साहित्य: एक मोठ्ठी कैरी (साधारण ४५० ग्रॅम), दुप्पट साखर, चवी पुरते मीठ, वेलची पूड, केशर
साखरेऐवजी तुम्ही गूळ देखील घालू शकता.

कृती: १) कैरीचे साल काढून घ्यावे. सगळा हिरवा भाग काढावा. नंतर ती कैरी cooker मध्ये ३ शिट्या होईपर्यंत वाफवावी.
२) कैरी गार झाली की त्याचा गर काढावा व mixer च्या भांड्यात घालावा. साखर आणि थोडेसे पाणी घालावे व mixer वर वाटून घ्यावे.
३) कैरीच्या paste मध्ये चवीनुसार मीठ घालावे. स्वादाला वेलची पूड घालावी आणि परत एकदा mixer वर वाटून घ्यावे.
४) हा झाला concentrated pulp तयार! fridge मध्ये हा pulp छान टिकतो. पन्हे बनवायचे असेल त्या वेळी २ मोठे चमचे pulp glass मध्ये घ्यावा आणि त्यात तिप्पट गार पाणी घालून चमच्याने ढवळावे. त्यात केशराच्या काड्या घालाव्यात आणि serve करावे.

काही महत्वाचे: १) कैरीची साल पूर्णपणे काढून घ्यावी. कैरीला जर साल राहिली तर ती mixer वर नीट वाटली जात नाही.
२) कैरीच्या आंबटपणानुसार साखरेचे किंवा गूळाचे प्रमाण कमीजास्त करावे.

मूळ प्रेषकः रेश्मा ओक
http://takkuuu.blogspot.in/2013/04/kairipanhe.html