कयाकिंग @ पानशेत (Kayaking)

सोमवार ते शुक्रवार हाफिस आणि वीकांत फिरण्यात व्यस्त असताना अचानक १ मे ची सुट्टी जाहीर झाली... महाराष्ट्र दिन, कामगार दिन (म्हणजेच बैलपोळा :-p) या गोष्टींना फाट्यावर मारायला लावणारी "Month End" नावाची एक जबरा चीज आहे याची नव्याने जाणीव झाली. पण शेवटी सुट्टी मिळालीच. :-) पानशेत बोटींग क्लब ला जायचे बरेच दिवसांपासून डोक्यात होते. तेच ठरवून सकाळी ०७ वाजता बाईक हाणायला सुरूवात केली.. वडगांव पुलाजवळ सगळे मित्र जमून डोणज्याच्या दिशेने गाड्या वळवल्या. डोणज्यापर्यंतचा रस्ता नेहमीसारखाच अरूंद, खड्ड्यांनी भरलेला आणि सिंहगडाच्या दिशेने भरधाव जाणारे पब्लीक यांनी व्यापलेला होता, पण आजूबाजूला असलेला निसर्ग हे सगळे विसरायला लावत होता, उन्हाचा रखरखाट सुरू होता होताच आम्ही नाष्टा करायला थांबलो. मिसळ, पोहे, वडापाव यथेच्छ चापून पानशेतच्या रस्त्याकडे कूच केले.. (फोटो मुद्दामच दिले नाहीयेत - आभार मानल्याबद्दल धन्यवाद ;-)) खडकवासल्यापासून पानशेत धरणापर्यंतचा रस्ता अवर्णनीय आहे. संपूर्ण प्रवासात रस्त्याच्या बाजूने नदी आपली सोबत करते. बोटींग क्लब मध्ये पोहोचल्या नंतर तिथल्या व्यवस्थापकाने आमच्यापैकी एका नेहमीच्या मेंबराला ओळखले आणि त्यांच्या गप्पा सुरू झाल्या.. आम्ही पाण्यात जायचा मार्ग कुठे आहे - कसे जायचे - कुठून उतरायचे - किती वेळ आहे.. वगैरे "क" च्या बाराखडीत गुंतलो असताना व्यवस्थापक महाशय स्वतःच आमच्या बरोबर आले. जलाशय खुणावत होताच. सुरूवात केली पोहोण्यापासून.. लाईफ जॅकेट घालून पोहणे हा बेक्कार अनुभव होता.. पाण्याखाली पोहता येत नव्हते, सूर मारता येत नव्हता आणि तरंगण्यासाठी फारसे कष्ट घ्यावे लागत नव्हते. :-( थोड्यावेळाने कयाकिंग सुरू केले. खूप लांबपर्यंत फेरी मारून, कयाक बरोबर खेळ करून (खेळ करताना कयाक उलटी होता होता वाचवून) काठावर परतलो. येता येता रेस लावण्याचे निष्फळ प्रयत्न केले पण मोटरबोट जवळून गेल्यानंतर उसळणार्‍या लाटेने कयाक सांभाळता सांभाळता पुरेवाट होत होती. रेस दूरच राहिली. सर्फींग - बोटीमागे दोरीने बांधलेल्या एका सर्फ बोर्डवर आपण झोपून / उभे राहून लांब फेरी मारायची. फेरी मारता मारता वेगाने बोट वेडीवाकडी फिरते, बोट फिरल्याने बोर्ड पण तसाच फिरतो आणि आपण त्याच वेगाने पाण्यात पडतो. :-O बनाना राईड - सर्फ बोर्डसारखीच मजा. :-) मनसोक्त पोहणे, कयाकिंग, सर्फींग आणि राईड आवरल्यानंतर थोडा वेळ पाण्यात निवांत पडून राहण्याची मजाही अनुभवली. पाण्यातून बाहेर येवून गरमागरम खेकडा भजींवर ताव मारला.. :-) पुन्हा तोच निसर्गरम्य रस्ता टळटळीत दुपारी पार करून पुणे गाठले, उन्हावर उतारा म्हणून बास्कीन रॉबीन्स ला भेट दिली. संध्याकाळचा बार्बेक्यू नेशन कट्टा खुणावत होता. अधिक माहिती - १) लाईफ जॅकेट सक्तीचे आहे. २) कयाकिंग - ३० मिनिटे - रू. १००/- ३) सर्फिंग - १ राईड - रू. १५०/- ४) बनाना राईड - १ राईड - रू. १५०/- ५) पोहणे - फ्री - पण परवानगी नाहीये :-O आम्ही सकाळचे पहिलेच कष्टंबर आणि बराच वेळ फक्त आम्हीच असल्याने आम्हाला पाण्यात उतरू दिले. ते पण लाईफ जॅकेट घालूनच. ६) कयाक घेवून धरणाच्या भिंतीकडे जायला परवानगी नाही.