विडंबन

आमची प्रेरणा मिलिंद फणसेंची सुरेख कविता नेपथ्य

का शेवटी माकड पिणार्‍याचे होते ?
माझेच नव्हे, हे ज्याचे त्याचे होते !

चालता लुडकतो इकडे तिकडे पडतो
हे असेच नेहमी बेवड्यांचे होते

लागली वळाया नजर सारखी माझी
हे लक्षण रे थोडी चढल्याचे होते

तू चषक कशाला दिलास हातामध्ये ?
मज दिसू लागले चित्र उद्याचे होते

सोडता सुटेना मदिरा माझ्याच्याने
मज खरे प्रलोभन मदिराक्ष्यांचे होते

जर ताड, माड अन् मोह असे देशीही
मग कशास अवडंबर द्राक्ष्यांचे होते ?

प्रदीप कुलकर्णींची कविता "...का?" ही आमची प्रेरणा -
.....................................
...का?
.....................................

आडवा झालोच मी हलकेच अन्
देह माझा चादरीने झाकला...!
पसरला अंधार तो ...माझ्यावरी -
-का तुझा तो 'बा' असा हा वाकला?

व्यर्थ धडपडशील तू माझ्यासवे
भान याचेही तुला नाही जरी...
मी असा तुज...सवेही हिंडतो -
- का हिंडतो तो घेउनी सोटा करी?

शेज ही भासेच काटेरी जरी
स्पर्श तो होताच अन् झाली कडी..!
आग आहे अंतरी, बाहेर ही -
- का बडवुनी हा सोलतो ही कातडी?

आमची प्रेरणा बेसनलाडू यांची सुरेख कविता/गझल खर्डेघाशी

जिलबीवर जिलबीच्या राशी
जेवण झाले, अले घशाशी

भले भुकेले राहू आम्ही
खाऊ तर खाणार तुपाशी

फोडासम सुजलेले शैशव
तुलना झाली सदा फुग्याशी

जरा बुटांशी खेळुन झाले,
'टॉमी'ने केली बदमाशी!

किती पाखरे आली गेली
एखादे आलेच गळ्याशी

बांधून हे लग्नाचे बंधन
"केश्या"ची झालेली काशी

हिच्या बरोबर जगणे शिक्षा
हीच का मरेस्तोवर फाशी?

प्रसाद यांच्या गुंड लोकांचे या सुंदर कवितेपासून स्फुर्ती घेऊन हा प्रयत्न.

तहानेने सुकत गेले तोंड लोकांचे
भाषणाने फक्त चाले तोंड लोकांचे

चतकोर भाकरी हि गुंतवी आशा
आश्वासने केवळ पुसती तोंड लोकांचे!

दुथडी भरून वाहे येथली कृष्णा
कोरडेच उरले मराठी तोंड लोकांचे...

दंगल बाहेर नि असती घरात हत्यारे
दत्त आडनावच उजळी तोंड लोकांचे

जरी मंचावर घालती गळ्यात हे गळे
मुखवट्या आड दडले तोंड लोकांचे

दोस्तहो तलवार नाही, लेखण्या परजा
लेखणी नक्कीच फोडे तोंड लोकांचे...

-ऋषिकेश

आमची प्रेरणा प्रसाद यांची अप्रतिम गझल नोकरांना जात कुठली, धर्म कुठला शेटजी
आणि खोडसाळ यांचे तितकेच अप्रतिम विडंबन नोकरांना खाज सुटली, घर्म फुटला शेटजी

माकडाची जात याची, मूढ कुठला केशवा
जो तुम्हाला वाटला तो हा न इथला केशवा!

एक कविता चांगली ना सोडली जालावरी
बघ विडंबन पाडण्या बाजार जमला केशवा...

'पाडणे' जरी मी तुझे चुकवले होते
तोंडावर अमुचे काव्य अपटले होते

'त्या' विडंबनाचे दुःख कराया हलके
का उगीच नवखे शब्द प्रसवले होते?

लक्षात ठेव ते शेर दोन फसलेले
(तू मुळात नुसते शब्द बदलले होते)

राहिल्यात मागे नकोनकोशा ओळी
ते घाव मी जरी सर्व विसरले होते

थेंबातलि कवने किती टपकली होती!
पाऊस 'पाडणे' कुणा न जमले होते!!

नको तुला रे शंकाच तुझ्या कवनाची!
बघ खुळे पुन्हा ते लोक हासले होते!!

आमची प्रेरणा मिलिंद फणसेंना शीर्षक न सुचलेली गझल.

लाटणे जरी मी तुझे चुकवले होते
दारावर अमुचे तोंड अपटले होते

साक्षीस ठेव हे दात दोन पडलेले
तू मुळात ज्यांना जरा हलवले होते

राहिल्यात मागे स्मृतिपोकळ्या आता
ते घाव मी जरी सर्व विसरले होते

'ते' दुरावल्याचे दुःख कराया हलके
मी मुखात नकली दात बसवले होते

लीलया चघळले कर्वे मी जीवनभर
ते ऊस सोलणे परी न जमले होते

भ्रम,"केश्या"ला विडंबन आवडल्याचा
रे खुळ्या, तुला हे लोक हासले होते !

आमची प्रेरणा प्रदिप कुलकर्णी यांची अप्रतिम कविता मी दुःख विसरण्यासाठी गातो गाणी...
...................................................
ही नेहमीचीच हो माझी रामकहाणी...!
...................................................

ही नेहमीचीच हो माझी रामकहाणी
तोंडाचे माझ्या बघा पळाले पाणी !

ओढून इथे मज तिने आणले होते
कोणी न तिथे हे,नीट जाणले होते...
आहेच सखीही माझी खूप शहाणी !

माणुस १ यांच्या 'गजल' या गजलेच्या विडंबनाचा हा अजून एक प्रयत्न. केशवसुमारांचे (गजल) हे विडंबन वाचून मलाहि त्या सुंदर गजलेचा विडंबन पाडण्याचा मोह झाला. चुका पदरात घेणे:)
--------
हाकले मग भैय्यांना हा रा़ज होता
मुंबईत फक्त त्याचा आवाज होता.

आझमीही शब्दांची मग डागे गोळी
दोघांमधील संवाद खटकेबाज होता

वाहत्या गंगेत धुवुया हात थोडे
आपमतलबी समाजवादी बाज़ होता

आग शब्दांतील होती कापरासम
कृतीशुन्यतेचा हा महायाज होता

आमची प्रेरणा माणूस१ यांची सुरेख गज़ल

मंदसा अन, निर्विकारी , बाज होता
पण तरी ही जाहला आवाज होता

पादला तो शांतपणे बघ दोन वेळा
काय हा खाऊन आला आज होता?

पाडले मीही प्रयत्ने काव्य थोडे
पण विडंबन हाच माझा बाज़ होता

आग शब्दांतील कसली डोंबलाची
खानदानी आमचा तो माज होता

तोंडदेखी वाहवा केली न माझी
येव्हढा का तो कवी नाराज होता?

लाथ थप्पड ह्या अशा आभूषणांनी
सजवला नेहमीच अमुचा साज होता

मी कशाला रोज त्या जातोय वाटे ?
हेच उत्तर, "माल गर्रेबाज होता" !