प्रेमकाव्य

तुझ्याशिवाय काय गवसले
सांग सखे तुजला
हजार वेळा जरी चाचपले
ह्रदय माझे शिंपला

शिंपल्यातील मोती माझा
वसे तुझ्या नयनांतुनी
गुलमोहर बहरतो माझा
तव रक्तवर्णी ओठांतुनी

गुलमोहराचा बहर सारा
हास्यातुन तुझिया ऊधळे
मंद गंधासह फिरे वारा
मंतरल्या श्वासात ऊसळे

श्वासात श्वास, आरक्त नजर
चेहर्‍यावर ही संध्यालाली
मिटलेले ओठ, अंतरी गजर
तव प्राण दाटले कर्णफुली

कोवळ्या प्रितीचे गुज ऐकुनी
उष्मावली तव कर्णपाळी
ओठी उतावळा 'हो'कार दाबुनी
सुंदर हसली गालावर खळी

|- मिसळलेला काव्यप्रेमी -|
(२६/०२/२०११)

श्रावणाच गाण तुझ्या ओठी सुरु होत,
ऊन पावसाशी झिम्मा, मन खेळत बसतं॥

इन्द्रधनुच्या कमानीत तुझी कमनीय काया,
माझ्या मनाला मोहते,तुझी सप्तरंगी छाया॥

ओठी बासरी तुझ्या, तिचे वेडे खुले सुर,
चिंब पावसात भिजे, मन बनून मयूर॥

माथ्यावरी सजे मोरपिसं, जणू पाचूचा खड़ा,
आला बघा गं सयांनो, माझा कान्हा-सावला॥

त्याच्या सोनेरी देहाची, सोन्या सारखी किरणे,
तशी सोनेरी शेवंती, गाते पहाटेचे गाणे॥

माझ्या सावल्या देहात, "सावल्या"चेच चैतन्य,
दर्पणात पाहे मी, माझ्या सावल्या चे बिंब॥

मंडळी, आज वेळ मिळाला म्हणून लगोलग दोन कविता डोक्याला दोन कवीता सुचवू दिल्यात. (आपल्यावर होणार्‍या अन्यायाबद्दल क्षमस्व.)

मैत्रीमधे वजाबाकी
दोषांची करावी
मैत्रीमधे बेरीज ती
गुणांची करावी
मैत्रीत हवा गुणाकार
मैत्रीत नको भागाकार
मैत्रीच्या गणितांमधे
शून्याला नकोच आधार !
खेळता खेळता आकड्यांनी
मैत्रीचे धागे विणावे
विणता विणता धाग्यांनी
जाळे सुंदरसे बनवावे
मैत्रीच्या जाळ्यात
खूप खूप गुरफटावे
मैत्रीचे नंतर गणित
आयुष्यात ना सुटावे !!

न लगे कोठे, शोधे तुज माझे मन
न दिसे काही, दिसे तुझे ते नयन

तु नाही तर कुठे आहे सागर
तु नाही तर कुठे आहे तरंग

एक एक थेंब वाहतो जसा
वाट पहाते तुझी माझे जीवन

न लगे कोठे, शोधे तुज माझे मन...

तु नाही तर कुठे आहे सुख
तु नाही तर कुठे आहे चैन

एक होण्यास धावते बरोबर
नदी काठ होते जसे बेचैन

न लगे कोठे, शोधे तुज माझे मन..

तु नाही तर कुठे आहेत तारका
तु नाही तर कुठे आहे आसमंत

क्षितिजा वर मिळेल धरा जणू
मज मिळेल का तुझे आलिंगन

न लगे कोठे, शोधे तुज माझे मन
न दिसे काही, दिसे तुझे ते नयन....!!