कविता

तसा काव्याच्या प्रांतात मी नवशिक्याच.. जमेल तशी केलीय, चू.भू.दे.घे.

मी पहात होतो दूर,
तू दिलास मजला सूर,
लावलीस मला हुरहूर,
मी पहात होतो दूर..

मीच होतो मूढ,
की तूच होती शूर,
तू केलस मला चूर,
मी पहात होतो दूर..

तुझा होता वेगळाच नूर,
माझ्या भावनांना आला पूर,
तू छेडलास माझा सूर,
मी पहात होतो दूर..

तू आलीस जवळ पुरेपूर,
सांग माझा काय कसूर,
लावलीस मला हुरहूर,
मी पहात होतो दूर..

तू पलटविलास तूझा नूर,
केलस मला भेसूर,
मी पहात होतो दूर....
तू... तू ऊडुन गेलीस भूर्र्....

फिनिक्स

इश्क जरी दाहक आग ही
खेळ विस्तवाशी मांडला,
राख जाहलो तरीहि
डाव अर्ध्यावर ना सोडला.

मिसळूनी राखेत जो
संपतो ते आम्ही नव्हे,
फिनिक्स पक्षासम उठूनि पुन्हा
डाव खेळू नवा तुजसवे.

निरंजन वहाळेकर

देवा एक माझे | पुरवावे कोड |
तुझे माझे आड | नको काही ||
नको कर्म कांड | नको ब्रह्म माया |
येर झार वाया | संसाराची ||
नको बडिवार | सोवळे ओवळे |
तेणे ना आकळे | सत्य तत्त्व ||
देवा ऐसे द्यावे | मज वरदान |
नामानुसंधान | राहो सदा ||
तुझी श्याम मूर्ती | सदा राहो चित्ती |
आणि सर्व वृत्ती | तुझे पाशी ||
सदाचा सन्नीध | माझ्या देव आहे |
प्रेमे मज पाहे | ऐसे व्हावे ||
अलोट ते सुख | तुज मी स्मरावे |
अंतरी राखावे | समचरण ||
प्रेम सागराचा | पूर तुझे दारी |
सर्वत्र श्री-हरी | बाकी काय ||
-- सागर लहरी २२.७.२०१०

सिच्यूऐशन: रातीचा पाउस पडूं र्‍हायलाय आन हिरो पहारा करायच्या डुटीला जावूं र्‍हायलाय......

आठवण आणि ……

वादळ, वारा, पावसातहि
भेटीस येणे अपूर्व होते,
प्रीतिचे ते क्षण उन्मादी
मनांत माझ्या ठसले होते

प्रेमकहाणी विफल आपुली
प्रारब्धाचे देणे होते,
विधिलिखित हे भालीचे
त्या समयी मज कळले नव्हते.

निशब्द अधिकार तुजवर
बिम्बवित मी गेलो नसतो,
स्वप्न मोगरा फुलवीत मनींचा
सुगंधित मी जाहलो नसतो.

जीर्ण घराच्या मज भिंतीवरची
तसविर तुझी चिरतरुण आहे,
गाली खळी अन ओठ गुलाबी
त्यांत आजहि तसेच आहे

निरंजन वहाळेकर

उजव्या बाजुस गजबजणारी तीच गाज घुमते अरबी
हा तोच किनारा फिरतो मी ।।धृ।।

दगडावरती झोकुन सारे
वार्‍यामनिचे गुपित खारे
लेउन लाटा उधळण करती तीच तुषारांची धुंदी ।।१।।

तोच दिवस त्या महिन्याचाही
तोच कोन त्या किरणांचाही
परंतु पृथ्वी सूर्याभवती व्यर्थ फेर फिरली काही ।।२।।

धरून ऐना कुंद हवेला
तनामनाने हिरवुन गेला
तसा न सागर आज सांगतो जन्मजन्मीच्या गुजगोष्टी ।।३।।

केसांमधल्या लाटा सारत
शब्दहासरे तुषार बरसत
उजव्या बाजुस गाज रोखुनि चालत तू ना मजसाथी ।।४।।

आमची प्रेरणा क्रान्तियांची सुरेख रचना अरूपाचे रूप आणि हरिकथेतील कीर्तनकुमार परा यांचे अवलियाचे रूप>

"अवलिया" रूप। अवांतर खूप
पाध्ये देई चोप । वारंवार

कंटकांचेपाठी । रोजपडेकाठी
उभा पाध्येजेठी । चौपाटीत

मिपाचा कैवारी । साळसूद वरी
खर्डी व्यनी करी । संपादका

परात्पर गुरु । नाना कैवारु
सहजची उद्धरु । धागे काही

मायबाप, भ्राता । तूच सखा, त्राता
घे रे नीलकांता । सुदर्शन

केसुरंगा