शांतरस

अरूपाचे रूप | श्रीहरी स्वरूप
पाहता तद्रूप | जीव होई

भक्तांचियासाठी | चंद्रभागेकाठी
उभा जगजेठी | पंढरीत

दीनांचा कैवारी | सावळा मुरारी
संकटात तारी | पांडुरंग

भाव तेथे देव | नांदतो सदैव
कैवल्याची ठेव | अंतरात

मायबाप, भ्राता | तूच सखा, त्राता
रुक्मिणीच्या कांता | दे दर्शन

आलाय पाउस ...चिंब भिजून घे
तळहातावर थेंबांचा स्पर्श.......मनात साठवून घे..
थेंबांची सरसर,थेंबांचा नाद...कानामध्ये साठवून घे
पाउस आलाय ... भिजून घे

ओल्या ओल्या मातीचा गहिरा गंध....तुझा आहे
पानांचा ओला ओला हिरवा रंग.... तुझा आहे
चेहऱ्यावर पडणारा प्रत्येक थेंब.....तुझ्यासाठी आहे
आला आहे पाउस..भिजून घे

ढगांचही मन भरून आलय...... तुझ्यासारखं
मनातल्या मनात...त्याच गहिवरण समजून घे...
आला आहे पाउस...भिजून घे..

चिक्कार दिस झाल बाय
तुज्या डोल्यांच गान आयकलच नाय

आटवतय तुला शेतान भात लावताना
तिरप्या डोल्यांनी म्हटलवत 'धीन ताना धीन ताना'
कालजान गीटार वाजलवत चार दीस झोपलोच नाय
चिक्कार दिस झाल बाय
तुज्या डोल्यांच गान आयकलच नाय

खारीवर आल्तीस दुपारची लाजत होतीस
पापनीचे पल्याडशी 'मुजे रंग दे, मुजे रंग दे' बोलत होतीस
त्यादीवशी तुला रंगवताना मी दमलोच नाय
चिक्कार दिस झाल बाय
तुज्या डोल्यांच गान आयकलच नाय

आले माहेरी माहेरी माझ्या विठाईच्या दारी
फारा दिसांनी ग झाली माझी पंढरीची वारी

वाट बदलली तरी काही ओळखीच्या खुणा
नव्या रानराईतही निशिगंध फुले जुना

खुल्या आकाशी चांदणं रात चंद्राने भिजली
नभमाईच्या केसात चंद्रशब्दांच्याही ओळी

काही भेटल्या ग सया सया आठ-आठवाच्या
वारी सरली गुजात जुन्या हास-आसवाच्या

नवे सौंगडी भेटले, जिवाभावाचे मैतर
नव्या आठवांची घेते घेते भरून घागर

आता पाय स्पर्शू किती घेऊ आशीर्वाद किती
किती मातीचे ओघळ ओघळवू मी या हाती

माझी पंढरीची वाट वाट सूर्याची पूर्वीची
आता पश्चिमेची ओढ ओढ लागली प्रियाची