कविता

किती वर्षे झाली
आपली घट्ट दोस्ती होऊन
नाव तर ऐकून होतो
नवसाला पावतोस म्हणून
मग अचानक ओळख झाली
७ -८ वर्षाचा होतो तेव्हापासून
तेव्हाच तुला मी मित्र केला
परीक्षेच्या दिवशी तुला नमस्कार केला
नि पेपर मला सोपा गेला
शप्पत ...!
हे अगदी खरे सांगतोय बाप्पा तुला ...!
अगदी मनापासून... !!

एकदा शंकर देवळात
कान उघडुन बसला
भक्तांच्या ललकाय्रा ऐकुन
खुदकन मनात हसला

भं...भोले..ही अरोळी
खरोखरच छप्परतोड
कुणाच्या मनाची जखम
तर कुणाचा नुसताच फोड

माझ्याकडे येणारे असेच
कुणी शांत,कुणी भेदरलेले
आयुष्याच्या कलहात
कुणी मिटलेले,कुणी विटलेले

होते काहो ती अरोळी..
जीवनरोगाचे औषध?
का थोड्या वेळाचं मलम
नी शेवटी नुसतीच खदखद

तुंम्ही म्हणाल या खेरीज
दुसरा जालीम उपाय काय?
का तुंम्हीही अमच्यासारखेच..?
समस्या आली...की बाय बाय

तुझ्या कल्पने जाहली खल्बली अन्
नजर ती तुझी मखमली काहिशी
तुला पाहता वाहता शीतळी अन् -
तरी जाहली काहिली ही अशी

तुझी सावली पावली मावली अन्
पुढे धावली कावली ती किती
मला अंगणी पाहुनी थांबली अन्
क्षणार्धात ती होतसे चोरटी

तुझ्या दर्शनाला नभी चंद्रयाने
किती सांग मी तेथ धाडायची?
तुझा चेहरा चंद्र नसला तरीही
तुझ्या भोवती तीच हिंडायची

कशाला फुकाची कुणाच्या मनाची
भिती किल्मिषांची उरी घ्यायची?
खुली रंगवू या आकाशात नक्षी
गुजे सावकाशीत सांगायची

श्लील अश्लील

जन्मताक्षणी मी आईला विचारलं
माते माझा जन्म श्लील की अश्लील
माता म्हणाली बाळा श्लील रे श्लील
मग मी धर्ममार्तंडांना म्हणालो
मार्तंडहो माझा जन्म श्लील की अश्लील
ते एकरवानं उद्गारले
अश्लील अश्लील