तुझी माझी प्रित होती
तुझी माझी प्रित होती, विसरूनी जा
जिवनात आले वादळ कधी, विसरूनी जा ||धृ||
हातांना ना कधी, गुंफण आता मिळायची
पावलांना सवय होवूदे, एकटेच चालायची
भेटलो तो किनारा, विसरूनी जा
तुझी माझी प्रित होती, विसरूनी जा ||१||
त्या आर्त नजरा, ते नजरेतले बोलणे
न बोलताच कळणारे मनातील हुरहुरणे
आठवणींना सांग, स्मरणातूनी निघूनी जा
तुझी माझी प्रित होती, विसरूनी जा ||२||
आठवते मला दिलेले मोरपीस निळेगार
तूही वहीत ठेवले होते पिंपळपान जाळीदार
भेट दिली घेतली, परत घेवूनी जा
तुझी माझी प्रित होती, विसरूनी जा ||३||
