विडंबन

सेल मांडीयेला

सेल मांडीयेला,...............थैल्या घेउन हाती
धावती ग्राहक भाई रे
विचार विवेक,................गेला पालटूनी
विचार विवेक,................गेला पालटूनी
एकमेका सांगतील घेई रे

सेल मांडीयेला,...............थैल्या घेउन हाती
धावती ग्राहक भाई रे..........................|धृ|

सुंदर 'खयाली पुलाव' पकवणार्‍या संजोपरावांचा हा असा 'आसपास' वावर बघून आम्हाला काही कळेनासे झाले की हे असे अचानक का व्हावे? आणि त्या स्तंभितावस्थेतच विडंबन आमच्या 'आसपास' भटकून गेले! ;)

ओढा खाली, पाडा त्याला, बोलत काही बाही
सूर वेगळे, नवी तुतारी जरी वाजवू पाही
जरा वेगळी टपरी दिसता पोटभरुन हासले
मिसळ निघाली जहाल आणिक सारक होऊन बसले!

सांजसकाळी जाऊ लागल्या कानोसा घेण्यात
मग्नच असती कोणी येथे कुजबुज ती करण्यात
दात विचकुनी, किचकिच करुनी घसे कसे बसले
मिसळ निघाली जहाल आणिक सारक होऊन बसले!

जयन्ता५२ ह्यांचे 'नको' वाचून आमच्या मनात नकोनकोते विचार तरळून गेले! ;)

निरख मला, गिळू नको
सोडा ओत! पाणी नको

गात्रात शिरशिरी येता
चषक असा टाळू नको

घेतोस का शपथा अशा?
टाळून मला पळू नको!

अशक्य नाहीच, पण
'ऑन द रॉक्स' घेऊ नको

चेतविले आहेस मला
जिवा त्या का जाळू नको?

--------------------------------
चतुरंग

(........आकाशाशी जडले नाते !!)

प्रभुश्रीराम, गदिमा, सुधीर फडके यांची माफी मागुन हे विडंबन--

-----------------------------------------------------------------------------

आकाशाशी जडले नाते, जेट एअरवेजचे !
टेकओव्हर झाले डेक्कनचे टेकओव्हर झाले डेक्कनचे !!

गोयंकाने सहज उचलिले वीर इंडियन्सचे !
पुर्ण जाहले मॅनेजमेंटच्या हेतु अंतरीचे !
कमी जाहले प्रवास भाडे, जो तो झेपावे !!टेकओव्हर झाले डेक्कनचे टेकओव्हर झाले डेक्कनचे !!

नीलहंस यांची 'उभी भिंत डागाळलेली छताशी' ही भेदक कविता वाचून आमच्या डोळ्यांसमोर वेगळेच रंगीत चित्र उभे राहिले! ;)

किती रंगल्या पानपिंका मुखाशी, खुजे देव भिंतीवरी मांडलेले
उभी भिंत डागाळलेली मुळाशी, वळे ना कधी पोळ निर्ढावलेले

कुठे कनवटीचीच काढून चंची लावीत तांबूल होते सुखाने
कुठे चार लुंग्या वरी-सावरुनी जणू रंगवीती सडका रसाने

कळकून गेली दशा फत्तराची वहाती पुटे सोबतीला रसीली
दिशा कोंदल्या, सूचना फाटलेल्या आणि एक गोळी जिभेखालि गेली

प्रदीप कुलकर्णींच्या प्राणाची तुळस बहरलेली पाहून आम्हांला मात्र धडकी भरली :)

भरदार तुझ्या दिसण्याने
नेहमीच धडकी भरते... !
झाडु घेउनी उभा ज़री
बिन् दिक्कत ही अवतरते... !

तो तुझाच - खोलीमधला
कुरतडला गाउन, सदरा... !
अन् तुझ्याच हाय कृपेने
भार्येचा चढतो पारा... !

या मंत्रभारल्या वेळी
मी इथे एकटा नाही... !
ते तुझेच - उंदिर,झुरळे
मावश्या नि बोके काही... !

ही शांत, सुभगशी संध्या
पण किंचित उदासवाणी... !
ओट्यावर, ज़मिनीवर ना
सांडले दूध वा पाणी... ?

मिलिंद फणसें  पीस बघून मोहरले पण आम्हाला 'पीस' बघून आलेला अनुभव फार भयंकर होता.

पाहिले मी काल, आवडलीस तू
काय नखरा, काय रुपडे, 'पीस' तू

अर्थ भलते लावले शब्दांतले
चंडिका होउन मग थरथरलीस तू

लोक जमले ऐकुनी आरोह तो
येव्हढे जोरात ओरडलीस तू!!

विस्कटूनी लावली माझी कुडी
ह्या 'घडी'साठीच ना टपलीस तू?

काल लाथांनी मला कुटला वरी
गूढ वर तू का पुन्हा हसलीस तू?

शब्द प्रेमाचा कसा मोडेन मी?
ठेवला आहेस मज ओलीस तू!

आमची प्रेरणा मिल्याची सुंदर गझल जीवघेणे

रेकते रेड्याप्रमाणे! जीवघेणे
का असे म्हणतेस गाणे! जीवघेणे

नाव ओठांवर कुणाचे घेतले मी
आमचे चुकले उखाणे जीवघेणे

एक तर गिरवायची शेणात नावे
आणि वासाचे बहाणे जीवघेणे

'कबुतरां'ना पाहणा गेलो खरे पण
भेटले भलते ससाणे जीवघेणे

चालतो मी आज येथे हे असे का?
पाडले होते उताणे जीवघेणे

तिंबले कणके परी मजला कशाला?
रोजचे हे मार खाणे जीवघेणे

बायकोला खण उघडताना मिळाले
आमचे काही पुराणे जीवघेणे

मिल्या चे 'जीवघेणे' बोल वाचून आमच्या काही दुखर्‍या आठवणी जाग्या झाल्या. ;)

चालणे की ते मटकणे! जीवघेणे
वेधती का नेत्र, सजणे! जीवघेणे

रंग ओठांवर कशाचा येत आहे?
बायको घाली उखाणे जीवघेणे

एक 'ती' फिरवायची बाहेर आणी
त्यात प्रेमाचे बहाणे जीवघेणे

'अंगवसने' तारणारे कोण आता?
रात होता वाटे दिवाणे जीवघेणे

काल केले म्यान सगळे कुशलतेने
आज श्वशुरांचे 'घराणे' जीवघेणे

मेव्हण्याची दुष्मनी मुरवा कशाला?
रोजचे 'बाहेर जाणे' जीवघेणे