कविता

आरती बल्लाळाची
(चालीसहीत)

जयदेव जयदेव जय पालीश्वरा हो देवा पालीश्वरा
आरती ओवाळीतो मी तुज देवा बल्लाळा
जयदेव जयदेव || ध्रु ||

देवूळ तुझे मोठे चौसोपी दगडी
आत असे मुर्ती शेंदरी उघडी
समोर मोठी घंटा अन खांब लाकडी
वर्णावया रुप तुझे बुद्धी माझी तोकडी || १ ||
जयदेव जयदेव || ध्रु ||

जिंका हारा पाडा झोडा एकमताने
सत्ता येता लोणी चापू एकमताने

टांगायाची बाकी आहे वेशीवरती
अब्रु लुटूया जत्रेनंतर एकमताने

देश आमचा तरुणाईचा पहा झोपला
म्हातारे पोलाद म्हणवती एकमताने

सत्तेसाठी सोडले पहा कमरेचेही
नागवा म्हणती समोरच्याला एकमताने

सत्तेच्या सर्कशीत नाहि मजा राहिली
विदुषकांनी केला गोंधळ एकमताने

सारे लढती खुर्चीसाठी प्राणपणाने
वार्‍यावरती देश सोडला एकमताने

तरीही वेड्या आशेने मत देतो आहे
राज्य स्वतःचे चालवेन या एक मताने

-ऋषिकेश

जेव्हा ते मावळतीच्या शेजार्‍याघरीं बालेकिल्ला बांधत होते -
तेव्हा ते होते पवित्रभूमिरक्षक!

जेव्हा ते उगवतीच्या शेजार्‍याला रक्तबंबाळ करीत होते -
तेव्हा ते होते शहीद व्हायला निघालेले स्वातंत्र्यसैनिक!

आता त्यांच्या बंदुका रोखल्यात आमच्यावरच -
हो, खरे आहे - ते आहेत दहशतवादी!!

क्षितीज दुरुन फार छान दिसते,
म्हणुन त्याकडे नुसते पहायचे नसते.
तर त्याला आपण गाठायचे असते..

सुर्य चंद्र जिथे रोज उगवतात,
तिथे आपणलाही एक दिवस पोहचायचे असते.
म्हणुन त्याला आपण गाठायचे असते..

जितके आपण पुढे पळू तितके तेही पळते,
पण आपण मुळीच कंटाळायचे नसते.
तर त्याला आपण गाठायचे असते..

खुप लोक असेही असतात जे मागे ओढतात,
पण आपण क्षितीजाचेच ध्येय ठेवायचे असते.
कारण त्याला आपण गाठायचे असते..

एक दिवस कळते आपण बरेच अंतर कापलेले असते,
आणी तरीही क्षितीज तिथुनही तितकेच दुर असते.
पण मागील लोकांना आपण क्षितीजावरच असल्याचे भासते..

वेदना ही आज माझी - अंतरीची साद आहे
देह माझा चंदनी अन चित्ती तुझा नाद आहे ।

जगताना जगले असे मी ध्यास तुझा घेउनी
उमगले अंती आता - श्वास माझा तूच आहे ।

दिवस चालती काळोखाला सांगाती घेउनी
रवी-शशी नभी असता अंधाराचे नाव आहे ।

सतत वर्षती अमृतधारा परोपरी धरेवरी
अंतरी स्मरणांचा धगधगणारा दाह आहे ।

वाटेवर चालता मिळे काटेरीच पखरण ही
रंग गंधी फुलाफुलांचा गाव तर दूर आहे ।

चांदण्यांची शुभ्र फुले - वेचियली मी येथे
भंगलेल्या स्वप्नांचा त्या आज मला शाप आहे ।

खरंच मला बरंच काही करायचायं
आयुष्यातला प्रत्येक क्षण न क्षण तुझ्या साथीनी जगायचायं
हातात हात गुंफून तुझ्या प्रत्येक स्वप्न पहायचाय !!
अगणित चांदण्या मोजत रात्रभर जागायचाय
आणि वाळूत रेषा ओढत सुर्यास्त बघायचाय !!
प्रणयाला चंन्द्र साक्षीला हवा
सोबत तुझी उब आणि हवेतील गारवा !!
तुझ्या सोबतीनी मला गरुडा साऱखं उडायचाय
मला जाणणारं तुझं मन मात्रा आयुष्यभर जपायचाय
खरंच मला बरंच काही करायचायं !!

(विडंबन)
आज सकाळी ट्रेड्मीलवर व्यायाम करीत होतो.कानाला इयरबड्स लावून आयपॉडवर हिंदी
सिनेमानतली गाणी ऐकत होतो.
"झुमका गिरा रे बरेलीके बाजार मे"
हे गाणं कानावर पडून मनात दुसरेच शब्द गुणगुणायला लागले "झुणका खाल्ला रे "आणि नंतर त्या मुळ गाण्याचं विडंबन केल्यावाचून मला राहावेना.मग म्हटलं लिहायचंच.लिहिता लिहिता शब्द सुचत गेले.आणि गाणं तयार झालं.

झुणका खाल्ला रे
हाय
झुणका खाल्ला रे बोरीवलीच्या हाटलामधे
झुणका खाल्ला झुणका खाल्ला झुणका खाल्ला
हाय हाय हाय तिखट झुणका खाल्ला रे

शिशिरी मळभ दूर झाले, उत्तरायणी रवी आले,
बेहोषला आसमंत, मी वसंत मी वसंत...

खुलते आज कळीकळी, पानोपानी ही झळाळी,
भ्रमराला ना आज उसंत, मी वसंत मी वसंत...

ध्यान उभे बैराग्याचे, सळसळणारे मन त्याचे,
पिंपळाचा श्वास संथ , मी वसंत मी वसंत...

आज तयाला भान नुरे, सुवर्णाचे नाजूक तुरे,
राजस आम्र उन्मत्त, मी वसंत मी वसंत...

धरा होती ती ल्यायली, दाट धुक्याच्या त्या शाली,
सुवर्णरेखा ही दिगंत, मी वसंत मी वसंत...

तृणांकुराचे हे थवे, आज भासती नवे नवे,
पानगळीची उगा खंत, मी वसंत मी वसंत...

अधीर आर्त स्वरांनी
पुसते धरा नभाला
तो गंध तुझ्या स्मृतींचा
सख्या कुठे निमाला...

प्रीतीत रंगलेला
कणा-कणात रुजलेला
अपुल्या मधु-मिलनाचा
मृदगंध कुठे हरवला...

आठवते अजुनी
भेट तुझी सौख्याची
त्या भेटीत गुंफलेला
स्नेहबंध कुठे गळाला...

स्खलित जाहले
पतिव्रता जरी मी
मनात गुंतलेला तो
स्पर्ष कुठे निमाला...

व्याकुळ धरणी वरुणासाठी
कृषक, पुत्र तिचा तोही पुसतसे
वरदहस्त प्रभो,
तव तो कुठे हरवला...

विशाल