पुणेरी कथा - पाळावयाचे नियम

गजाननच्या आशीर्वादाने व शनिवारवाड्याच्या साक्षीने आम्ही 'तुळशीबागेत भेटेल तुला मी' या कथामालेचा शुभारंभ करत आहोत!
प्रस्तुत कथा ही ५१ भागात प्रकाशित होणार आहे.तरीही ही कथा वाचताना पाळावयाची काही पथ्ये!
१. ही कथा ५१ भागात असल्याने कोणीही 'लवकर भाग टाका' अशी प्रतिक्रिया देऊन आपल्या अधाशिपणाचा प्रत्यय देऊ नये. (त्यांना १ ते४ या वेळेत 'चितळे' नामक वाट कशी पहावी या शाळेत पाठवले जाईल.)
२. 'पुभाप्र' नामक पळवाट वापरल्यास त्याला पुण्यात लुंगी घेण्यासाठी पाठवण्यात येईल.
३. १ ते ४ या वेळेत कथेवर प्रतिसाद टाकल्यावर आपण रिकामटेकडे आहात असा अर्थ काढण्यात येईल.
४. व्यनि करून ओळखी काढण्याचा प्रयत्न करु नये. आमच्या ओळखीने चितळे नामक दुकानात पदार्थ लवकर मिळत नाही!
५. रिकामे सल्ले देऊ नये, घरातील पोरं तुम्ही त्यांना सल्ला दिल्यावर हाताखालून काढतात हे आम्हास चांगले ठाऊक आहे.
६. "अय्या किती छान लिहितात तुम्ही" असे म्हणून आपल्या जिलेबिंवर चांगल्या प्रतिसादाची अपेक्षा करु नये,आमच्या वाड्यात आमची हरिश्चंद्र सीनियर म्हणून ख्याती आहे!
७. ही कथा कुठेतरी वाचली आहे म्हणून आम्हाला 'ट्रॅप'मध्ये अडकवायचा प्रयत्न करु नये.आमची एक लघुकथा महाभारत नुकतीच प्रसिद्ध झाली आहे!
८. नसत्या चुका काढू नयेत. शालजोडित देण्यात येतील!
९. "बर झालं कधीचे जोडे नव्हते हो!" म्हणून अपमान करु नये. आम्ही नेहमी दोन नं. कमीच पाठवतो.
१०. आता आपल्या जोड्याचा क्र. आम्हांस कसा माहित हे विचारू नये. असली क्षुल्लक कामे आम्ही शेरलॉक होम्स नामक घरगड्यास सोपवीतो!
११. आम्ही आठवड्यातून फक्त एकच भाग टाकतो. हे काम नसून परोपकार आहे याची आम्हांस जाणीव आहे.

आणखी काही पथ्ये पुढच्या वेळी!