मिसळपाव
करशील ना?
हातात हात घेऊन चालताना,
रुतेल पायात काटा,
घाई घाईने काढलास तरी चालेल,
पण नंतर हळुवार मारशील ना फुंकर?
नव्याची नवलाई संपत असताना,
होतील असंख्य प्रश्न उभे,
प्रत्येकाचं उत्तर नाही दिलं तरी चालेल,
पण नंतर हळुवार घेशील ना कुशीत?
अस्तित्वाच्या कल्पना कोलमडून जाताना,
जड होईल अपेक्षाच ओझ,
प्रत्येकवेळी वाटून घेतलं नाहीस तरी चालेल,
पण नंतर हळुवार मन करशील ना हलक?
तुला माझी माझी तुला सोबत असताना,
येईल एकटेपण आगंतुकासारख,
प्रत्येकवेळी डोळ्यांनी शोधलं नाहीस तरी चालेल,
पण नंतर हळुवार पाठवशील का कवितेला शोधत?