मनोहर पर्रीकरांचे चिरंजीव उत्पल पर्रीकर पणजीमधून निवडणुक लढवायला उत्सुक आहेत. पणजीमधून मनोहर पर्रीकर १९९४ पासून सहावेळा निवडून गेले होते. उत्पल पर्रीकरांनी पक्षासाठी काही काम केल्याचे निदान मला तरी माहित नाही. केवळ मनोहर पर्रीकरांचा मुलगा या एका क्वालिफिकेशनवर त्यांना उमेदवारी दिली जायला नको असे वाटते. पण मागे म्हटल्याप्रमाणे भाजपने बाबूश मोन्सेराट या बलात्काराचे आरोप असलेल्या गणंगाला काँग्रेसमधून आपल्या पक्षात घेतले आहे. बहुदा त्याला उमेदवारी दिली जाईल ही शक्यता आहे. त्याने तरी पक्षासाठी नक्की कोणते काम केले आहे? असल्या घाणेरड्या माणसाला उमेदवारी देण्यापेक्षा उत्पल पर्रीकर कधीही परवडले. त्यांनी पक्षासाठी फार काही केले नसले तरी त्यांची पाटी कोरी आहे. या बाबूश मोन्सेराटप्रमाणे घाणेरड्या आरोपांनी भरलेली नाही. तेव्हा बाबूशपेक्षा उत्पल पर्रीकर उमेदवार म्हणून नक्कीच चांगले. हे टाईप करता करताच एक बातमी वाचली की बाबूश मोन्सेराट आज संध्याकाळी महालक्ष्मी मंदिरापासून आपला प्रचार सुरू करणार होता पण त्याने तो बेत रद्द केला आहे. https://timesofindia.indiatimes.com/city/goa/babush-calls-off-campaign-launch-as-utpal-eyes-ticket/articleshow/88797261.cms . म्हणजे त्याला उमेदवारी मिळणार नाही ही पण शक्यता दिसते. तसे असेल तर फारच उत्तम. जर उत्पल पर्रीकरांना भाजपने उमेदवारी दिली नाही शिवसेना उमेदवारी देईल असे म्हटले जात आहे. तसे संकेत संजय राऊत यांनी दिले आहेत असे आंतरजालावर वाचले पण ती लिंक या क्षणी सहजासहजी मिळाली नाही. जसा आदर मनोहर पर्रीकरांविषयी वाटायचा तो आदर मनोहर पर्रीकरांचे चिरंजीव या एकाच क्वालिफिकेशनमुळे या उत्पल पर्रीकरांविषयी नक्कीच वाटत नाही/वाटणार नाही. पण ते शिवसेनेत गेल्यास मात्र त्यांच्याविषयी थोडीफार असलेली सद्भावनाही संपून जाईल हे नक्की. त्याच शिवसेनेच्या त्याच संजय राऊत यांनी आपल्या वडिलांविषयी नक्की काय गटारगंगा वाहिली होती याची आठवण सगळ्यांनाच करून द्यायला हवी. मनोहर पर्रीकरांनी ऑगस्ट २०१७ मध्ये पणजीमधून पोटनिवडणुक लढवली होती. त्यावेळी व्हॉट्सअ‍ॅपवर एक व्हिडिओ व्हायरल झाला होता की केला गेला होता. त्या व्हिडिओत 'जर पणजीमधून पराभव झाला तर आपण केंद्रात संरक्षणमंत्री म्हणून परत जाऊ' असे पर्रीकरांनी म्हटले होते असे त्या व्हिडिओत सांगितले गेले. खखोदेजा. बाकी कोणा भाजप उमेदवाराचा पणजीमधून पराभव होऊ शकेल ही शक्यता मान्य केली तरी खुद्द पर्रीकरांचा पराभव पणजीमधून होईल ही शक्यता जवळपास शून्य होती. तेव्हा या व्हिडिओत तथ्य नसावे असे वाटते. तेव्हा हा व्हिडिओ आल्यावर संजय राऊत काय म्हणाले होते? मनोहर पर्रीकर हे एक अपयशी संरक्षणमंत्री होते. https://www.dnaindia.com/india/report-shiv-sena-says-parrikar-was-a-failure-as-defence-minister-2533903 . पर्रीकर अपयशी संरक्षणमंत्री असतील तर मग व्ही.के.कृष्णमेनन एकदम यशस्वी संरक्षणमंत्री होते नाही का? तसेच २०१८ मध्ये पर्रीकर कर्करोगाने आजारी असताना ते उपचारासाठी परदेशी गेले होते. तेव्हा राज्याला सेनापती नसल्याने प्रशासन कोलमडले आहे इतकेच नाही तर गोव्याला 'आजारी राज्य' म्हणून जाहीर करावे असली गटारगंगा त्याच संजय राऊतांनी वाहिली होती. https://www.lokmat.com/goa/announce-state-ill-health-goa-sanjay-raut/?fbclid=IwAR09xRAziG-ATvqlzX2jhjlazrhdSCM4szNR4YahF167PBFLGwJ4Bv_b6Dg . आणि त्यावेळी उद्धव ठाकरे हे सामनाचे संपादक होते त्यांना हे सगळे बरळलेले चालले होते. हे इतरांविषयी असले काही बरळत असतील तर मग हे स्वतः आजारी पडल्यावर लोक त्यांच्याविषयीही बोलणारच. त्याला इलाज नाही. असो. सगळ्यांनाच ज्यांच्याविषयी आदर होता अशा आपल्या वडिलांविषयी असले बरळणार्‍या पक्षात उत्पल पर्रीकर गेले तर मात्र त्यांच्याविषयी थोडीफार असलेली सद्भावनाही पूर्ण संपून जाईल. याची जाण उत्पलना असावी ही अपेक्षा.