मध्यमध्वनीलहरी ४२० कि.ह. आम्ही मनाच्या आकाशवाणी केंद्रावरून बोलत आहोत. सकाळचे पाच वाजून पंचावन्न मिनिटे आणि तीन सेकंद झालेत. आमच्या आज प्रसारित होणाऱ्या ठळक कार्यक्रमांची रूपरेषा... सकाळच्या सभेत सुरुवातीला ऐकू या ‘भक्तीवंदना’! यात ज्याच्यात्याच्या मनाचे श्लोक सादर होतील! त्यानंतर ‘मनाची शेती’ कार्यक्रमात, ‘मनातल्या गाजर गवताला आळा कसा घालावा?’ याविषयी मार्गदर्शन केले जाईल. दिवसभराच्या जगण्याच्या झेंगटाचा आढावा घेतला जाईल, ‘हवामनाचा अंदाज’ मध्ये! विविध वाहिन्यांवरून प्रक्षेपित होणाऱ्या भल्याबुऱ्या बातम्यांचे सहक्षेपण दरघटकेला होईलच! गृहिणींसाठी ‘मनातल्या पाककृती आणि प्रत्यक्षातील रसनिष्पत्ती’ या विषयावर कोरडी चर्चा होईल. दुपारच्या कामगार सभेत ‘कार्यालयीन मन:शैली’ या सदरात ‘रिकाम्या वेळेतील मनाचे उद्योग’ याविषयी गभळक्षऋ यांची मुलाखत सादर होईल. त्यानंतर ‘देश कि सुरिली धडकन’ मनाचे आकाशवाणी केंद्र पुनःपुनःप्रक्षेपित करेल! संध्याकाळी सहा वाजता ‘आपले मन, आपली माणसं’ यात जुन्या आठवणी, कातर वेळा, हरवलेले क्षण, सापडलेल्या डायऱ्या इत्यादींचा इमोसनल आढावा घेतला जाईल. ‘फोनइन’ मध्ये मनाच्या मनपसंत गीतांचा कार्यक्रम सादर होईल! रात्री साडेदहा वाजता ‘बेला के फूल’! whatsapp, फेबुक, गुगल, स्काईप, तूनळी इत्यादी कशावरूनही मन रेंगाळत राहील. रात्री ठीक अकरा वाजून पंचावन्न मिनिटांनी मनाच्या आकाशवाणी केंद्राचे बाह्य प्रसारण आपोआप विराम पावेल!