उंबरठा नसलेले घर - २

कां कोण जाणे पण परत
उंबरठा बांधायची हिंमतच
होत नाहीये
----
न जाणो ती अंगणातली
फुलदाणी घरात परत
आलीचं नाही तर?!
----
मग वाटतं बरं झालं
उंबरठा वाहून गेला
कच्चाच होता नाहीतरी
----
तुझी डायरी तेवढी
बाहेर काढून वाचायची
अनिवार इच्छा होतेय
किमान ती अलमारी तरी
शांत होईल... एकदाची !
----
देवघरासमोरच्या समईत
तेल घातले
वाटले
ज्योतीची घालमेल थांबेल
पण...
----
काल नाही समजले
पण
त्या उंबरठ्याबरोबर
"शुभ - लाभ" लिहीलेल्या
रांगोळीच्या ओळीही
वाहून गेल्या
हे आज लक्षात आले
----
पावसाची वाट बघतोय
काल रात्रीपासून
पडलाचं नाहीये
----
तुझी डायरी वाचतांना
कां कोण जाणे
सारखं धुक दाटतयं
डोळ्यांसमोर
----
बरं झालं
उंबरठा वाहून गेला
कच्चाच होता नाहीतरी

|- मिसळलेला काव्यप्रेमी -|
(०७/०७/२०१४)

उंबरठा नसलेले घर - १