Skip to main content

गझल - आणि हा खेळ झाला

लेखक वेल्लाभट यांनी सोमवार, 27/06/2016 11:24 या दिवशी प्रकाशित केले.

जरा हासलो आणि हा खेळ झाला
तुझा भासलो आणि हा खेळ झाला

तसा संयमी नित्य मी राहणारा
जरा त्रासलो आणि हा खेळ झाला

मला वाटले वेळ आलीच होती
तरी वाचलो आणि हा खेळ झाला

मला मोडणे मान्य होते तरीही
पुन्हा वाकलो आणि हा खेळ झाला

जरा शेवटी हात जोडावयाला
उभा ठाकलो आणि हा खेळ झाला

अता थांबता येत नाही अपूर्व
जरा धावलो आणि हा खेळ झाला

- अपूर्व ओक

काव्यरस
मराठी गझल
लेखनविषय:
वाचने 4356
प्रतिक्रिया 20

प्रतिक्रिया

निश बुधवार, 29/06/2016 17:32

मला मोडणे मान्य होते तरीही
पुन्हा वाकलो आणि हा खेळ झाला .....ह्या ओळि एकदम मस्त...

चतुरंग गुरुवार, 30/06/2016 23:16

नेहेमीप्रमाणेच आमची पोचपावती....

जरा हासलो आणि हा घोळ झाला
'तिचा' भासलो आणि हा घोळ झाला!

नसे संयमी नित्य मी चापणारा
जरा ग्यासलो आणि हा घोळ झाला!

रमा बोलता वेळ झाली भिशीची
उगा नाचलो आणि हा घोळ झाला!

सुरा सोडणे मान्य होते तरीही
पुन्हा प्यायलो आणि हा घोळ झाला!

असे तातडी, नाडि सोडावयाला
उभा ठाकलो आणि 'हा घोळ' झाला!

कवी तिंबती आज 'रंग्यास' जाली
जरा चावलो आणि हा घोळ झाला!

(घोळदार)रंगा

नाखु शुक्रवार, 01/07/2016 15:39

आणि पुढचा घोळ दोन्ही फर्मास..

घोळसलेला खेळाडु नाखु

सत्यजित... बुधवार, 03/05/2017 01:48

ज ब र द स्त!

त्यातही...त्रासलो,वाचलो आणि वाकलो...गजब शेर!

>>>मला मोडणे मान्य होते तरीही
पुन्हा वाकलो आणि हा खेळ झाला>>>पहिलीच ओळ कितीतरी पुरेशी आहे खरं तर आणि त्यात ही दुसरी!लाजवाब!

वेल्लाभट बुधवार, 03/05/2017 12:08

अरे वा. इतके दिवसांनी या ग़ज़लेचा धागा वर आलेला बघून छान वाटलं. प्रतिसादकांना मनापासून धन्यवाद. सत्यजित, मदनबाण, मितान, दशानन!