बांधावरचा पिंपळ सांगे
सोनसावळी दुःखे ओली
फांदी-फांदी जीर्ण पर्णिका
बांडगुळांची गर्दी सगळी
अस्ताईचे सूर अनोळखी
शुष्क पान्हा हळवी देवकी
कशी रुचावी जगण्यालाही
अस्थाईविन बंदिश पोरकी
सुकली पाने सुकली माती
खिन्न विरहिणी होय पालवी
पाणी सुकले बुंध्यापाशी
त्राही त्राही अंकुर डोकावी
कधी अकस्मित ओल मुळांना
कधी मेघांचे हळवे चुंबन
लागे जलदांना ओढ भूमीची
कधी अचानक अधीरे मिलन
नश्वर स्वप्ने, नश्वर दुःखे
नश्वरतेचा शाप सुखाला
शाश्वत ऐसे इथे न काही
श्वासांचा का ध्यास जीवाला ?
सोनसावळा पिंपळ वेडा
शुष्क डहाळ्या तरीही जपतो
आस लाजऱ्या मृगथेंबाची
मनी बाळगून जगत राहतो
विशाल १०-०५-२०१६
प्रतिक्रिया
10 May 2016 - 11:06 am | मिसळलेला काव्यप्रेमी
अजुन एक सुंदर रचना.. विशालभौ.. जियो...
हे खासचं....
10 May 2016 - 11:14 am | गणेशा
कविता मस्त ..
ग्रेस आठवले एकदम
10 May 2016 - 11:27 am | विशाल कुलकर्णी
अहाहा, सार्थक झालं. आज ग्रेससरांच्या जयंतीदिवशी कवितेला हि दाद मिळणं यासारखं दुसरं सुख नाही. धन्यवाद.
10 May 2016 - 11:19 am | विवेकपटाईत
मस्त कविता. आवडली.
आस लाजऱ्या मृगथेंबाची
मनी बाळगून जगत राहतो
आपल्या सर्वांचे असेच आहे.
10 May 2016 - 11:45 am | प्रीत-मोहर
वाह . क्या बात है. आवडली कविता विशालदा
10 May 2016 - 12:27 pm | ज्ञानोबाचे पैजार
विलक्षण चित्रदर्शी कविता....
आवडली अतिशय आवडली
पैजारबुवा,
11 May 2016 - 3:33 pm | विशाल कुलकर्णी
धन्यवाद देवानू !
इतरांचेही मनःपूर्वक आभार _/\_
10 May 2016 - 12:31 pm | बोका-ए-आझम
रूपक कविता म्हणून लिहिलीय का विशालभौ?
10 May 2016 - 12:59 pm | विशाल कुलकर्णी
रुपकच आहे बोकाभाऊ, ज्याला जे दिसेल तो अर्थ. धन्यवाद मंडळी _/!\_
10 May 2016 - 5:46 pm | एक एकटा एकटाच
वाह विशाल दा
11 May 2016 - 11:32 am | नाखु
कवीराजांनी म्हटलय आम्ही काय आणखी म्हणणार रे !!!
पिंपळा खालचा मुंजा नाखु
11 May 2016 - 4:36 pm | कैलासवासी सोन्याबापु
एक नंबर रे!!! तुमच्या रचना सूदिंग असतात विकु!
तलम एकदम! जियो पठ्ठे!
16 Sep 2016 - 11:13 pm | निनाव
विकु दा -.. अस्थाईविन बंदिश पोरकी .. जब्बर्दस्त
16 Sep 2016 - 11:18 pm | रातराणी
_/\_
18 Sep 2016 - 12:53 am | राघव
सुंदर. आवडेश! :)
18 Sep 2016 - 9:30 am | विवेकपटाईत
सोनसावळा पिंपळ वेडा
शुष्क डहाळ्या तरीही जपतो
आस लाजऱ्या मृगथेंबाची
मनी बाळगून जगत राहतो
वाह! काय म्हणावे.... आजकाल चुकून बायको लाजली कि मृगथेंबाची आस मनी जागतेच....
18 Sep 2016 - 10:06 am | पैसा
अप्रतिम कविता! हल्ली कुठे गायब आहेस रे विशल्या?