सद्भावना

कोणी आपुलाची
बोलु वाचे कौतुके
वात येईल इतुके
प्रतिसादे चौफेर
रांधे जैसे भातुके
खेळे नृपकन्या
बोलाची कढी
बोलाचेची बोलु
बोलाचेची खापरें
पुसोनी तैया
ताजी होई
.....ये काव्यखेचर आज रोजी मिपा मुकामी मिपा संस्थळी विजुभाऊ करवी अवांतरी प्रतिसाधका प्रत मस्तकी हाणीतले

महाराष्ट्रदिनानिमित्त मराठी मनांना हार्दिक शुभेच्छा आणि अभिनंदन! हे माझे वेडेवाकुडे बोल माझ्या महाराष्ट्रासाठी.

ज्ञानरायाची आळंदी, विठूरायाची पंढरी
माझ्या मराठी मातीने दिली जन्माची शिदोरी

महाराष्ट्रभूमी थोर रत्नमाणकांची खाण
क्रांतिकारी, देशभक्त इथे जन्मले महान

विचारप्रवर्तनाचे, ज्ञान-विज्ञान, विद्येचे
इथे नांदते गोकूळ सिद्धी-बुद्धीचे, प्रज्ञेचे

नामा-जनीचे अभंग, ज्ञानेश्वरी, दासबोध
तुकयाची गाथा, अमृतानुभवाचा प्रसाद

कला संस्कृतीची गोदा, श्रद्धा-भक्ती चंद्रभागा
कैवल्याच्या, मांगल्याच्या कृष्णा, मुळा, वैनगंगा

घमघमणा-या अत्तरकुपीत बंद फुलांचं स्पंदन असतं
उगाळण्यानं गंधाळायला दु:ख कधी का चंदन असतं?

पंचम लावून कोकिळ गातो सुरेल मंजुळ वसंतगाणी
कधी भासते प्रेमगीत ते, कधी भासते आर्त विराणी
मनीमानसी सुखदु:खाचं अखंड सागरमंथन असतं

दिवसरात्र या खुळ्या मनाची भिरभिर वा-यावरची वरात
कधी, कुठं ते हरवुन जाईल, धडधड अन् काहूर उरात
भीती कसली? वा-यालाही क्षितिजकडांचं बंधन असतं

जगण्यासाठी आधाराची काठी असते वेडी आशा
जे होतं ते भल्याचसाठी, सांगत असते अबोल भाषा
मर्म जाणलं ज्यानं, त्याचं जीवन ही अभिनंदन असतं

चैत्रगौरीचं हळदीकुंकू करायचंय, सगळ्या सुगरण ताया स्वैपाकघरात गुन्तल्या, तेव्हा म्हटलं, आपण लिम्बू-टिम्बू कंपनीनं गौर सजवावी. पहा आवडतेय का!
गाई कोकीळ भूपाळी सखे तुझ्या स्वागताला
इंद्रधनूचे तोरण शोभे तुझ्या गाभा-याला

घाल रात्रीचे काजळ, माळ वेणीत चांदणे
चंद्रकोरीची काकणे, दंवबिंदूंची पैंजणे

सोनसळीचा पदर, सांजरंगाची पैठणी
गर्भरेशमी आभाळशेला पांघर साजणी

सूर्यकिरणांनी रेख भाळी कुंकवाची चिरी
गळा नक्षत्रमण्यांची माळ खुलू दे साजिरी

गो-या तळव्याला लाव चैत्रपालवीची मेंदी
कर आकाशगंगेला तुझ्या भांगातली बिंदी