इकडची तिकडची खादाडी, अर्थात, अन्न हे पूर्णब्रह्म..!

राम राम मिपाकरहो, आंतरजालावर उत्तमोत्तम पाककृतींचे आज अनेक ब्लॉग्ज उपलब्ध आहेत. तिथे मुशाफिरी करतांना विविध पाककृतींनी नटलेला, खाद्य संस्कृतीची सुंदर उधळण करणारा असा एखादा ब्लॉग सहजच दृष्टीस पडतो आणि डोळ्याचं पारणं फिटतं, जीव तृप्त होतो! हे सदर केवळ अश्या ब्लॉगांसाठीच! त्या तमाम बल्लवाचार्यांच्या आणि सुगरणींच्या पाककलेची नोंद घेणे, त्याला मनमुराद दाद देणे व त्याची माहिती इतरांना करून देणे हे तुम्हाआम्हा खाद्यपंढरीच्या वारकर्‍यांचे परमकर्तव्य आहे असे आम्ही मानतो व त्याकरताच हे सदर आम्ही सुरू करत आहोत.. मिपाकरांनी येथे त्यांना भावलेल्या विविध पाककृतींच्या ब्लॉगांचे दुवे अगदी अवश्य द्यावेत आणि खाद्यधर्माचा प्रसार व प्रचार करावा ही विनंती! खाद्यधर्म हा जगातला असा एकच धर्म आहे की जिथे कुठलेही वाद नाहीत, हेवेदावे नाहीत! मिसळपाव डॉट कॉम या खाद्यधर्माची बांधिलकी मानून जगातल्या सर्व ज्ञात-अज्ञात खाद्यधर्मगुरूंना या सदराद्वारे अभिवादन करत आहे, त्यांच्या पाककलेस सलाम करत आहे! आपला, तात्या अभ्यंकर, संस्थापक, मिसळपाव धर्म. आमच्यापासून सुरवात करतो.. १) मिपाकर चकली यांचा सुरेख खाद्यब्लॉग. २) मीरा नावाच्या कुणा अन्नपूर्णेचा हा खाद्यब्लॉगही पाहण्याजोगा! चला तर मंडळी, लागा कामाला आणि द्या उत्तमोत्तम खाद्यब्लॉगांचे दुवे! :) आपला, (रसिक) तात्या.