अमृतप्याला

ब्लॉग दुवा हा

कविता - अमृतप्याला

प्रेरणा : https://www.youtube.com/watch?v=f4qqdbRMYG0
www.azlyrics.com/lyrics/lukebryan/drinkabeer.html

----------------------------------------------------------------

अमृतप्याला

आज ऐकुनि रुचले नाही
काय म्हणावे सुचले नाही
दिला ठेवुनि फोन तसाचि
जे झाले ते पचले नाही

दिशाहीन मी चालत सुटलो
विचार मागे रेटत सुटलो
दगडा दगडा मधे तरीही
तुलाच वेडा भेटत सुटलो

जावे वाटे घरी नकोसे
हवे हवे ते जरी नकोसे
विचार होती लाखो गोळा
माझे असले तरी नकोसे

इथेच बसुनि राहिन आता
जलाशयाच्या या काठाला
बुडत्या सूर्या पाहिन आता
हाती घेऊन अमृतप्याला

लोक चांगले सोडून जाती
लाटांपरि ही विरती नाती
बघेच असतो आपण सारे
बसून बघतो काठावरती

उद्या कसे हे असेल सारे
कुणास ठाऊक काय कसे
आजच्या परि दु:खावरती
उपाय आता करू कसे

इथेच बसुनि राहिन आता
जलाशयाच्या या काठाला
बुडत्या सूर्या पाहिन आता
हाती घेऊन अमृतप्याला

मला वाटते बरेच काही
तुझे आता पण ठाऊक नाही
आहे प्याला रोजचाच पण
पूर्वीची त्या गोडी नाही

तुझी आठवण येते फिरुनि
मावळतीला इथेच बसुनि
असायचो या काठावरती
अमृतप्याला हाती धरुनि

तसाच मी प्रत्येक दिसाला
येईन तुजला भेटायाला
अढळ स्थान देऊन टाकतो
तुला आणि या सूर्यास्ताला

जावे वाटे घरी नकोसे
हवे हवे ते जरी नकोसे
विचार होती लाखो गोळा
माझे असले तरी नकोसे

इथेच बसुनि राहिन आता
जलाशयाच्या या काठाला
बुडत्या सूर्या पाहिन आता
हाती घेऊन अमृतप्याला

(छायाचित्र जालावरून साभार)

- अपूर्व ओक