Skip to main content

लखलाभ!

लेखक रातराणी यांनी रविवार, 13/09/2015 14:01 या दिवशी प्रकाशित केले.

तू ये वाचली आणि त्यातला आव्हानाचा टोन भयंकर आवडला. त्यात आज आमच्या राशीत जिलबी पाडू योग आलेला दिसत असल्याने आम्ही लगेच वाहत्या गंगेत हात धुऊन घेतले. चू. भू. द्या. घ्या.

रानोमाळ भटकणारे तुझे निर्णय,
आणि जर तरच्या लाटांवर हेलकावे खाणारी तुझी नौका,
तुझा किनारा असो तुलाच लखलाभ!
मी समर्थ आहे! माझी नौका तारून न्यायला क्षितीजाच्याही पार!

पेन्सील वापरायची तुझी जुनी सवय,
कारण झालेल्या चुका खोडता येतात, बरोबर उत्तर लिहण्यासाठी
तुझी कोरी वही असो तुलाच लखलाभ!
मी समर्थ आहे! खाडाखोडीने भरलेलं आयुष्याच पुस्तक लिहायला!

डोळ्यांत हजार स्वप्नं घेऊन येतोस,
निराशेच्या एका रात्री ती सगळी सगळी परत करतोस,
तुझं हे अंधाराला शरण जाणं असो तुलाच लखलाभ!
मी समर्थ आहे! त्याच अंधारात माझ्या स्वप्नांचे कोवळे अंकुर पेरायला!

नदी होऊन मी भेटाव ही तुझी अपेक्षा,
तू तुझी वाट वाकडी करून नाहीच येणार माझ्याकडे.
तुझ्या ह्या अपेक्षा असो तुलाच लखलाभ!
मी समर्थ आहे! बेधुंद होऊन पुन्हा पुन्हा याच शिखरावरून कोसळायला!

काव्यरस
मुक्त कविता
लेखनविषय:
वाचने 5024
प्रतिक्रिया 25

प्रतिक्रिया

मांत्रिक रविवार, 13/09/2015 22:13

डोळ्यांत हजार स्वप्नं घेऊन येतोस,
निराशेच्या एका रात्री ती सगळी सगळी परत करतोस,
तुझं हे अंधाराला शरण जाणं असो तुलाच लखलाभ!
मी समर्थ आहे! त्याच अंधारात माझ्या स्वप्नांचे कोवळे अंकुर पेरायला! किती चपखल उदाहरण आहे! पुरुष असाच असतो, निराशेच्या छोट्याशा धक्क्यानेही स्वप्ने बदलणारा! आणि स्त्री!!! मनाची खमकी!!! तुटलेल्या स्वप्नांतून देखील एक सुंदर शिवणकाम निर्माण करणारी!!! सलाम तुमच्या लेखणीला!!!

नाखु सोमवार, 14/09/2015 09:11

अशी आव्हाने पेलणारे असतील तरच आव्हान देण्यात अर्थ आहे !
अन्यथा आव्हानच काय "आवाहन" ही व्यर्थ आहे !

अभामिपाजिल्बीबुवासंघ्संचालीत्यमकजमक्जुळवणी संघ

ज्ञानोबाचे पैजार सोमवार, 14/09/2015 09:19

मस्त आवेशात लिहिली आहे

कविता वाचुन अशीच एक बंडखोर मैत्रीण आठवली.

एवढी वर्ष झाली अजूनही ती तशीच आहे.

पैजारबुवा,

अभ्या.. सोमवार, 14/09/2015 11:00

रानोमाळ भटकणारे तुझे निर्णय,
आणि जर तरच्या लाटांवर हेलकावे खाणारी तुझी नौका,
तुझा किनारा असो तुलाच लखलाभ!
मी समर्थ आहे! माझी नौका तारून न्यायला क्षितीजाच्याही पार!

अहाहाहा
आवडले, भिडले, भावले, पटले.
सुरेख.