लखलाभ!

तू ये वाचली आणि त्यातला आव्हानाचा टोन भयंकर आवडला. त्यात आज आमच्या राशीत जिलबी पाडू योग आलेला दिसत असल्याने आम्ही लगेच वाहत्या गंगेत हात धुऊन घेतले. चू. भू. द्या. घ्या. रानोमाळ भटकणारे तुझे निर्णय, आणि जर तरच्या लाटांवर हेलकावे खाणारी तुझी नौका, तुझा किनारा असो तुलाच लखलाभ! मी समर्थ आहे! माझी नौका तारून न्यायला क्षितीजाच्याही पार! पेन्सील वापरायची तुझी जुनी सवय, कारण झालेल्या चुका खोडता येतात, बरोबर उत्तर लिहण्यासाठी तुझी कोरी वही असो तुलाच लखलाभ! मी समर्थ आहे! खाडाखोडीने भरलेलं आयुष्याच पुस्तक लिहायला! डोळ्यांत हजार स्वप्नं घेऊन येतोस, निराशेच्या एका रात्री ती सगळी सगळी परत करतोस, तुझं हे अंधाराला शरण जाणं असो तुलाच लखलाभ! मी समर्थ आहे! त्याच अंधारात माझ्या स्वप्नांचे कोवळे अंकुर पेरायला! नदी होऊन मी भेटाव ही तुझी अपेक्षा, तू तुझी वाट वाकडी करून नाहीच येणार माझ्याकडे. तुझ्या ह्या अपेक्षा असो तुलाच लखलाभ! मी समर्थ आहे! बेधुंद होऊन पुन्हा पुन्हा याच शिखरावरून कोसळायला!