Skip to main content

सख्या रे..

लेखक प्राची अश्विनी यांनी बुधवार, 14/06/2023 या दिवशी प्रकाशित केले.
न्हाऊ कशी सख्या रे तनु चंद्र जाहलेली काया अजून आहे स्पर्शात माखलेली.. न्हाऊ कशी सख्या रे आताच फूल झाली, कळी काल मोग-याची केसांत माळलेली. न्हाऊ कशी सख्या रे अंगांग पेटलेले, ते तेवतात अजुनी तू दीप लावलेले. न्हाऊ कशी सख्या रे मृद्गंध आसपास, जो कोसळून गेला पाऊस काल खास. न्हाऊ कशी सख्या रे देही चितारलेले, जे शब्द जाफरानी ओठी तुझ्या न आले..
काव्यरस
शृंगार
लेखनविषय:
वाचने 10327
प्रतिक्रिया 31

प्रतिक्रिया

कर्नलतपस्वी बुधवार, 14/06/2023
कविता मोरपीस सारखी आहे. सख्या कदाचित असे उत्तर देईल. धुंद आठवणी त्या साठव मन कुपीत सांगू नकोस कोणा तू कालचे गुपीत

कर्नलतपस्वी गुरुवार, 15/06/2023
कविता एकांगी वाटते. परवानगी असेल तर दुसरी बाजू डकवतो. तयार आहे. सख्याचे म्हणणे आहे,विडंबन नाही.

राजेंद्र मेहेंदळे गुरुवार, 15/06/2023
अर्थही लागतोय आणि वृत्तातही चपखल बसतेय. आवडली.

चांदणे संदीप गुरुवार, 15/06/2023
आणखी एक सुंदर रचना. सैल असावी मिठी... ची आठवण झाली. :) सं - दी - प

राघव शुक्रवार, 16/06/2023
नको रे असा दूर जाऊ सख्या तू.. सुगंधाविना, मोगरा, पोरका तू.. सांगू कसे, का फुले - रातराणी!! तुला ना कळे लोचनांची कहाणी..

राजेंद्र मेहेंदळे शुक्रवार, 16/06/2023
नको रे असा, दूर जाउ वड्या तू चटणीविना बालका ,पोरका तू पावाविना डिश का ये हाताशी तरीही तुला हादडी मी अधाशी!!

चित्रगुप्त शनिवार, 17/06/2023
मस्त आहे रचना. 'जाफरानी शब्द' या जाफरानी संकल्पनेबद्दल आमच्याकडून एक जाफरानी तोहफा कुबूल कीजियेगा: .

अवतार मंगळवार, 27/06/2023
अतिशय तरल आणि नेमक्या शब्दांत आशय व्यक्त केला आहे.

किल्लेदार बुधवार, 20/12/2023
न्हाऊन घे सखे तू ... का अशी आळशी येतो पुनः निशेला राहू नको पारोशी... न्हाऊन घे सखे तू... दाव थोडी कसोशी वा मीलनात अपुल्या उगा शिंकेल माशी...

राघव बुधवार, 20/12/2023
न्हाऊन घ्या दोघेही.. का उगा मखलाशी?? पुनःपुन्हा कशाला.. त्या आंघोळीची काशी!! 😉

राजेंद्र मेहेंदळे गुरुवार, 21/12/2023
उपाशी, अधाशी, काशी, मखलाशी शी ची पार काशी केलेय प्रतिसादांनी श्श्शी!!

राघव गुरुवार, 21/12/2023
वाह! चांगलंय की! @किल्लेदार, उपाशी आणि अधाशी वापरायचे राहिलेत हो.. येऊं देत! स्वगतः त्या प्राचीतैने फोडून काढले नाही म्हणजे मिळवली! ;-)

किल्लेदार शुक्रवार, 22/12/2023
अरे ते "न्हाऊन" आहे "खाऊन" नव्हे. हे शब्द वापरायचे असतील तर... खाऊन घे सखे तू... राहू नको उपाशी पुरे पोह्यांची बशी होऊ नको अधाशी ... शी शी शी !!! पडल्या-पडल्या उशाशी... काहीतरीच सुचले मघाशी